Mediat ndërkombëtare i kanë kushtuar një vëmendje të posaçme ndeshjes së zhvilluar në “Telia Parken” të Kopenhagenit midis Danimarkës dhe Shqipërisë, duke e interpretuar lojën dhe rezultatin në mënyra të ndryshme, por pa harruar të vënë në pah meritën e madhe të kuqezinjve shqiptarë në mbrojtje të barazimit që i hap rrugën ëndrrës së tyre për një kualifikim në Kampionatin Evropian “Francë 2016”. Natyrisht, mediat daneze kanë qenë kritike ndaj skuadrës së tyre dhe kanë shprehur habi se si nuk u mund Shqipëria.
Kurse mediat italiane dhe ato spanjolle kanë qenë më pranë nesh, duke thurur elozhe për taktikën e De Biazit dhe për suksesin e Shqipërisë në këto eliminatore, gjë që i ka dhënë vëmendje të madhe grupit I të Eliminatoreve. Mediat daneze dhe ato ndërkombëtare i kushtojnë një rëndësi të madhe sfidës së zhvilluar në Kopenhagen mes Danimarkës dhe Shqipërisë e cila vlente shumë për fatet e të dyja skuadrave në grupin I të Eliminatoreve.
Shumica e tyre vlerësojnë kombëtaren kuqezi për barazimin historik që arriti në tokën daneze. Faqja e UEFA-s lidhur me ndeshjen e “Telia Parken” shkruan: “Shqipëria i reziston presionit të Danimarkës, duke theksuar se Etrit Berisha në shumë raste ndali tentativat e futbollistëve vendas, duke i dhënë një barazim me shumë vlera skuadrës së Xhovani De Biazit, ndërsa Danimarka me këtë barazim nuk arriti të parakalonte dot Portugalinë në renditjen e grupit I”.
Mediat daneze nga ana tjetër e cilësojnë si një dështim barazimin me Shqipërinë në Kopenhagen: “Zhgënjim i madh i Danimarkës në “Parken””, është ky titulli kryesor i gazetës “EkstraBladet”. Ndërkohë e përditshmja tjetër daneze “TipsBladet” shkruan: “Danimarka nuk arrin të thyejë dot Shqipërinë”. Mediat italiane gjithmonë i kushtojnë një rëndësi të veçantë ndeshjeve të kombëtares shqiptare kjo edhe për faktin se kuqezinjtë drejtohen nga një italian si Xhovani De Biazi.
Ato e kanë cilësuar si shumë pozitiv barazimin e marrë nga përfaqësuesja jonë në Danimarkë. “Barazim i artë për De Biazin shkruan “Gazzeta Dello Sport”. Edhe “SportMediaset” hapet me një titull afërsisht të ngjashëm. “Barazim i shtrenjtë i Shqipërisë ndaj Danimarkës”. Në Spanjë, As shkruan: Danimarka nuk mundet përballë një Shqipëri që vazhdon të ëndërrojë, ndërsa “L’Equipe” thekson se Danimarka dhe Shqipëria nuk ishin në gjendje të përcaktonin fatet e grupit I.
Siç shihet he nga përmbajtja e artikujve, duket qartë se evropianët janë të interesuar për ecurinë e grupit I të Eliminatoreve dhe kjo është shumë pozitive dhe për Shqipërinë, e cila, në faqen zyrtare të UEFA-s ishte fill pas ndeshjes si lajm i dytë i rëndësishëm, menjëherë pas fitores së Gjermanisë dhe marrjen prej saj të kryesimit të grupit përballë Polonisë që ishte lajm i parë.
