ASNN – Kristof Piatek do të jetë i Milanit për katër vitet e ardhshme dhe konsiderohet si një blerje cilësore e kuqezinjve në këtë merkato dimri. 35 milionë Euro do të paguajë Milani në arkat e Xhenoas, pa përfshirë shpërblimet shtesë, të cilat mundësojnë kalimin përfundimtar të sulmuesit polak në radhët e kuqezinjve në “San Siro”.
Sikundër shkruajnë mediat sportive italiane, Piatek do të firmosë për 4 vite e gjysmë me Milanin, për një pagë neto prej 2 milionë Eurosh në sezon. Autori i 13 golave në kampionat dhe i 19 finalizimeve në total me fanellën e Xhenoas, të mërkurën do të jetë në dispozicion të trajnerit Ivan Xhenaro Gatuzo.
Me kalimin e Piatek te Milani është zhbllokuar edhe transferimi i Gonzalo Higuainit në Premier Ligën Angleze, tek Çellsi. Kjo lëvizje e Milanit, duke marrë sulmuesin e dytë më të mirë aktualisht në Serie A, pas Kristiano Ronaldos, tregon se kuqezinjtë synojnë të paktën zonën e 4-shes së parë në renditjen e Serisë A.
Një pozicion ky që të siguron pjesëmarrjen në Ligën e Kampionëve. Mbetet të shihet nëse Piatek do të përmbushë pritshmëritë e tij tek Milani, por paraqitjet e tij me Xhenoan i japin atij “kredite” mjaft të mira dhe një nivel të lartë besimi.
