ASNN – Turneu i ekipeve përfaqësuese rajonale është mbyllur të enjten me finalet e grupmoshës së Nën-13-vjeçarëve, që u zhvilluan në Qendrën e Ekipeve Kombëtare në Kamëz. Në këtë grupmoshë, ku merrnin pjesë fëmijët e datëlindjes 2009, është shpallur fitues ekipi rajonal i Fierit që mundi në finale skuadrën e Tiranës. Koha e rregullt u mbyll në barazim 0-0 dhe nga pika e bardhë e 11-metërshave ishin fierakët më të saktë, duke triumfuar me rezultatin 4-2.
Dueli për vendin e 3-të dhe të 4-t të kësaj grupmoshe u fitua nga ekipi rajonal i Korçës, që mposhti Durrësin me rezultatin e ngushtë 1-0. Si zakonisht gjatë turneut, në ceremoninë e dorëzimit të trofeut simbolik ishin të pranishëm përfaqësuesit e Federatës Shqiptare të Futbollit, Përgjegjësi i Zbulimit të Talenteve, Xhemal Mustedanagiҫ, eksperti i futbollit, Sulejman Mema si edhe përfaqësues të tjerë të FSHF-së.
Nën-13-vjeçarët e Fierit arritën në finale duke mundur Elbasanin 3-1 dhe Durrësin me rezultatin 2-0, ndërsa Tirana e Nën-13-vjeçarëve kishte kaluar Lezhën (5-2 pas 11-metërshave, teksa koha e rregullt u mbyll 1-1) dhe Korçën (fitoi 6-0). Turneu i ekipeve përfaqësuese rajonale për grupmoshat Nën-15, Nën-14 dhe Nën-13-vjeçe nisi më datë 12 janar 2021, për t’u mbyllur këtë të enjte përmes një organizimi mjaft të mirë të Federatës Shqiptare të Futbollit.
Fëmijët u impenjuan për 9 ditë me radhë në këtë turne që përfshin futbollistët e vegjël nga e gjithë Shqipëria. Siç dihet, qëllimi i këtij turneu është evidentimi i talenteve të reja që militojnë në kampionatet rajonale të FSHF-së dhe vëzhgimi i tyre nga stafi i ekipeve kombëtare. Në këtë turne morën pjesë ekipet përfaqësuese rajonale të 3 grupmoshave (Nën-15, Nën-14 dhe Nën-13-vjeçe) nga Tirana, Durrësi, Fieri, Shkodra, Elbasani, Korça, Lezha dhe Gjirokastra.
U13 dt.2009: Fier, Elbasan, Durrës, Gjirokastër
Dt. 19.01.2021 (E martë) – Aneksi i stadiumit “Loni Papuçiu”, Fier
- Fieri – Elbasani 3 – 1
- Durrësi – Gjirokastër 1 – 1 (5-3 me penallti)
– Ndeshja finale
– Durrës – Fier 0 – 2
– Ndeshja për vendin e 3-të & të 4-t
– Gjirokastër – Elbasan 1 – 2
U13 dt.2009: Tiranë , Korçë, Shkodër, Lezhë
Dt.17.01.2021 (E diel) – Kompleksi sportiv “Qendra Ekipeve Kombëtare”, Kamëz
- Tirana – Lezha 1 – 1 (5-2 penallti)
- Korça – Shkodër 1 – 0
– Ndeshja finale
– Tirana – Korça 6 – 0
– Ndeshja për vendin e 3-të & të 4-t
– Shkodra – Lezha 2 – 0
Finalet
Dt.21.01.2021 (E enjte) – Kompleksi sportiv “Qendra Ekipeve Kombëtare”, Kamëz
– Finalja e moshës U-13
Tirana – Fieri 0 – 0 (2 – 4 penallti)
