ASNN – Edhe Kampionati Kombëtar i Volejbollit për Meshkuj e ka mbyllur sezonin e tij të rregullt, duke përcaktuar edhe renditjen përfundimtare dhe, bashkë me të edhe çiftet e fazës së “play-off”-it. Dje janë luajtur ndeshjet e javës së 21-të, ku Vllaznia, për efekt kalendari, ishte pushim.
Kështu, Studenti ka arritur një fitore të lehtë dhe të pastër 3-0 në pallatin e sportit “Tamara Nikolla” mesditën e djeshme ndaj Skënderbeut vendës. Gjatë gjithë këtij sezoni, me skuadrat që ndodhen në pjesën e sipërme të tabelës së klasifikimit, Skënderbeu asnjëherë nuk ka mundur të bëjë rezistencë.
Tirana në volejboll për meshkuj ka vulosur vendin e tretë në renditjen përfundimtare të tre fazave me vajtje-ardhje, ndërsa Farka Volej nuk e ka përballuar dot, duke u mundur 1-3. Kështu, Tirana nuk e lëshon vendin e 3-të në renditje, ndërsa Farka Volej, që e kishte siguruar që më parë “play-off”-in, tanimë po mendon për duelet gjysmëfinale.
Në takimin tjetër, Elbasani i fundit të renditjes në Kampionatin Kombëtar të Volejbollit për Meshkuj ka bërë surprizën, pasi në takimin e vlefshëm për javën e 18-të dhe të fundit të sezonit të rregullt, ka mundur 3-0 Teutën. Duhet theksuar se durrsakët erdhën në këtë përballje pa motiv, pasi e kishin humbur betejën e tyre për vendin e 4-t.
Kampionati Kombëtar
i Volejbollit – Meshkuj
Java e 21-të
(9 prill 2016)
Farka Volej – Tirana 1-3
Elbasani – Teuta 3-0
Skënderbeu – Studenti 0-3
Vllaznia pushim
Renditja
Nr. Skuadra N F H Setet Pikë
- Studenti 18 14 4 46-21 41
- Vllaznia 18 14 4 46-25 40
- Tirana 18 11 7 42-24 37
- Farka Volej 18 11 7 39-27 32
- Teuta 18 9 9 35-36 25
- Skënderbeu 18 3 15 12-46 9
- Elbasani 18 1 17 10-51 5
