ASNN – Me ndeshjet e javës së tij të 20-të, edhe niveli më i lartë i Kampionatit Kombëtar të Basketbollit për Meshkuj, që njihet si Superliga, ka ulur siparin e sezonit të rregullt, për t’ia lënë vendin fazës së “play-off”-it për titullin “kampion”, ku janë përcaktuar edhe çiftet gjysmëfinaliste, që janë Kamza Basket-Teuta dhe Vllaznia-Tirana. 3 takimet e këtyre gjysmëfinaleve luhen më 11, 14 dhe 18 maj 2016, kjo e fundit nëse do të jetë e nevojshme.

Të premten, Kamza Basket e ka mbyllur si kryesuese dhe fazën e katërt dhe tashmë është gati për të luajtur “play-off”-in për titull “kampion”, atje ku përsëri në gjysmëfinale do të ketë Teutën. Skuadra e trajnerit Adem Muhametaj e ka fituar sfidën ndaj durrsakëve, të luajtur në Sallën Sportive të Bathores, me shifrat 79-71, ndërsa dy takimet e tjera të javës së 20-të u luajtën dje. Derbi kryeqytetas i basketbollit të meshkujve, që ka shënuar dhe fundin e fazës së katërt, është fituar përsëri nga Tirana.

Në një farë mënyre, rivalja bardheblu edhe është kursyer. Janë munduar të kuqtë të rivalizojnë, por e kanë pasur të vështirë, pasi Tirana fiton me rezultatin e përgjithshëm 76-60. Kurse Flamurtari e ka humbur ndeshjen e fundit në fazën e katërt me Vllazninë në Vlorë.

Tanimë skuadra vlonjate është duke menduar për sfidën e “play-out”-it, që do të luajë për të qëndruar në Superligë, ndërsa do të ketë përballë Superiorin. Ka qenë një ndeshje që ka folur për shkodranët, të cilët ishin më superiorë ndaj Flamurtarit, ndërsa nuk i kanë dhënë asnjë mundësi vlonjatëve për të reaguar, duke triumfuar me shifrat bindëse, 71-42.

Kampionati Kombëtar

i Basketbollit – Meshkuj

Superliga

Java e 20-të

(29-30 prill 2016)

Të premten:

Kamza Basket – Teuta                    79-71

Të shtunën:

Flamurtari – Vllaznia                       42-71

Tirana – Partizani                            76-60

Renditja

Nr.       Skuadra                     N.        F.         H.        Psh-Pp          Pikë

1. Kamza Basket          20        18          2        1457-1197     38
2. Vllaznia                     20        16          4        1445-1229     36
3. Tirana                         20        13          7        1543-1304     33
4. Teuta                          20          9        11        1485-1428     29
5. Flamurtari                  20          3        17        1097-1606     23
6.        Partizani                    20          1        19        1225-1478     21

Faza e “play-off”-it

për titullin “kampion”

Gjysmëfinalet:

Kamza Basket – Teuta

Vllaznia – Tirana

Shënim: 3 takimet luhen më 11, 14 dhe 18 maj 2016, kjo e fundit nëse do të jetë e nevojshme