ASNN – Është mbyllur në mbrëmje java e 31-të e Kategorisë Superiore të Kampionatit Kombëtar të Futbollit, ku, edhe pse kanë vuajtur për të marrë 3 pikë, Skënderbeu dhe Tirana janë skuadrat më të fituara të kësaj fundjave në superligë, ndërkohë që Partizani dhe Kukësi, dy ekipet e tjera pretendente kanë humbur nga 2 pikë në luftën për titullin “kampion”.
Kampionët në fuqi mundën minimalisht 1-0 Apoloninë, e cila është shumë pranë rënies në një kategori më poshtë. Ndryshe nga ç’ishte parashikuar në letër, korçarët e Josës u munduan shumë dhe vetëm goli i Sefës në minutat e fundit të ndeshjes i dha fitoren dhe mundësinë të qëndrojnë të qetë e të vetëm edhe këtë javë në krye të Superiores.
Partizani dhe Kukësi nuk kanë shkuar më shumë se një barazim 1-1 midis tyre në Stadiumin Kombëtar “Qemal Stafa”, një rezultat ky që largon gjithnjë e më shumë Partizanin nga titulli “kampion”. Raçiç shënoi golin për kryeqytetasit në pjesën e parë, ndërkohë që për kukësianët, autori i golit ishte i përhershmi Pejiç me 11-metërsh në të dytën.
Edhe Tirana e nisi keq ndeshjen me Elbasanin i cili kaloi në avantazh në minutën e 5 me Jaupin. Bardheblutë e mblodhën veten dhe barazuan me Hyshmerin fundin e pjesës së parë. 45 minutat e dyta folën për Tiranën e Maganit e cila shënoi edhe dy herë të tjera me Bushiçin dhe Elis Bakajn. Kjo fitore e mban Tiranën në vendin e tretë me 63 pikë, po aq Kukësi i vendit të dytë.
Ndeshja tjetër e kësaj fundjave, ajo mes Vllaznisë dhe Flamurtarit përfundoi në paqe 1-1, rezultat ky që mban të pandryshuara vendet e këtyre dy skuadrave në renditjen e Kategorisë Superiore. Të shtunën, skuadra kurbinase i shtoi një tjetër sukses ecurisë së saj pozitive të sezonit, duke mundur me rezultatin 1-0 Teutën.
Ndeshja e parë e kësaj jave u vendos nga goli i Shetës. Mbrojtësi shënoi pas një ore lojë, duke i dhënë një fitore të rëndësishme Laçit, që ngjitet në kuotën e 57 pikëve në tabelën e renditjes.
Kategoria Superiore
Java e 31-të:
Të premten, 17 prill 2015:
Laçi – Teuta 1-0
Shënues: Sheta 60’
Stadiumi i Laçit
Të shtunën, 18 prill 2015:
Elbasani – Tirana 1-3
Shënues: Jaupi 6’ / Hyshmeri 39’, Bushiç 79’, El. Bakaj 84’
Stadiumi “Elbasan Arena”, Elbasan
Vllaznia – Flamurtari 1-1
Shënues: Lika 60’/ Kruja 9’
Stadiumi “Loro Boriçi”, Shkodër
Partizani – Kukësi 1-1
Shënues: Raçiç 26’ / Pejiç 73’(11-m.)
Stadiumi Kombëtar “Qemal Stafa”, Tiranë
Skënderbeu – Apolonia 1-0
Shënues: Sefa 86’
Stadiumi “Skënderbeu”, Korçë
Renditja
Nr. Skuadra N. F. B. H. Gsh-Gp Pikë
1. Skënderbeu 31 20 6 5 49-16 66
2. Kukësi 31 19 6 6 48-21 63
3. Tirana 31 19 6 6 42-21 63
4. Partizani 31 18 6 7 34-22 60
5. Laçi 31 16 9 6 37-16 57
6. Flamurtari 31 9 8 14 25-29 34
7. Vllaznia 31 11 4 16 26-34 34
8. Teuta 31 8 2 21 26-45 26
9. Apolonia 31 5 4 22 11-48 19
10. Elbasani 31 4 1 26 16-62 13
