ASNN – Kategoria Superiore e Kampionatit Kombëtar të Futbollit ka luajtur të dielën pasdreke dy ndeshjet e para të javës së saj 13-të, ndërsa takimi i 3-të i kësaj jave ishte ai që u luajt në mbrëmje Shkodër, duke nisur nga ora 17:00, midis Vllaznisë dhe Skënderbeut dhe u mbyll me rrjeta të paprekura.
Në takimet e luajtura pasdreke, skuadra vendase, Laçi, nuk ka shkuar dot më larg se një barazim 2-2 në fushën e vet me Luftëtarin. Ndonëse skuadra gjirokastrite ka gjetur dy herë rrugën e rrjetës brenda 9 minutave të para, një gol në mesin e pjesës së parë dhe një në minutën e fundit të kohës së rregullt, kanë bërë që Laçi të marrë një pikë.
Në takimin tjetër të luajtur pasdreke, Teuta ka fituar 1-0 në Kukës ndaj Korabit, duke iu falur një goli të Artur Maganit në minutën e 11-të. Dy ndeshjet e fundit të kësaj jave luhen të martën në mbrëmje dhe Tirana është mysafire në Vlorë, për t’u ndeshur me Flamurtarin vendas, ndërsa Partizani pret në Elbasan Kukësin.
