ASNN – Java e 14-të e Kampionatit Kombëtar të Basketbollit për Femra ka luajtur dje dy ndeshjet e fundit. Nëse Apolonia e ka pasur të lehtë në Përmet, teksa ka fituar me një diferencë prej 55 pikësh, në Korçë është kërkuar koha shtesë për fituesen.
Në fund ia ka dalë Skënderbeu, që edhe duke fituar vetëm me një pikë diferencë, edhe për shkak të koshaverazhit më të mirë, është ngjitur në vendin e katërt. Një luftë e fortë në basketbollin për femra për të përcaktuar katër skuadrat e “play-off”-it final.
Dy takimet e para të javës së 14-të të Kampionatit Kombëtar të Basketbollit për Femra janë luajtur të shtunën dhe Flamurtari ka marrë një fitore bindëse, 82-61, në kryeqytet ndaj Studentit të Fiorentina Mitkut.
Në takimin tjetër të së shtunës, Vllaznia u mund në Shkodër nga Elbasani, me shifrat 62-66 dhe mikeshat e drejtuar nga trajnerja Elvira Xhyra, mbajnë gjallë shpresën për vendin e 4-t dhe të fundit që të çon në “play-off”-in final të titullit.
Elbasanaset ndajnë tashmë vendin e 4-t, të 5-të dhe të 6-të me Skënderbeun dhe Studentin, me nga 19 pikë. Ndërkohë, këtë javë Tirana ishte pushim, por mban vendin e tretë me 21 pikë.
Kampionati Kombëtar
i Basketbollit – Femra
Kategoria e Parë
Java e 14-të
(28 shkurt-1 mars 2015)
Të shtunën:
Studenti – Flamurtari 61-82
Vllaznia – Elbasani 62-66
Të dielën:
Përmeti – Apolonia 47-102
Skënderbeu – Kamza Basket 73-72
Tirana pushim
Renditja
Nr. Skuadra N. F. H. Psh-Pp Pikë
- Apolonia 12 12 0 1051-683 24
- Flamurtari 13 11 2 1083-757 24
- Tirana 12 9 3 961-759 21
- Skënderbeu 12 7 5 831-830 19
- Studenti 13 6 7 811-842 19
- Elbasani 13 6 7 874-962 19
- Vllaznia 13 3 10 874-937 16
- Kamza Basket 12 2 10 680-807 14
- Përmeti 12 0 12 543-1097 12
