ASNN – Veprimtaria e dytë e futbollit në vend, Kupa e Shqipërisë, ka luajtur të mërkurën pasdreke ndeshjet e para të dy prej çifteve të saj çerekfinaliste dhe Vllaznia ka hedhur një hap të rëndësishëm për kualifikim, teksa ka mposhtur minimalisht Teutën, në takimin e zhvilluar në Stadiumin “Loro Boriçi” të Shkodrës.
Kuqebluve u ka mjaftuar një supergol i shënuar nga Tafili në gjysmën e pjesës së parë, për të marrë një fitore minimale, por, të vyer ndaj Teutës. Po pasdreke, në Laç, vendasit kaluan të parët në epërsi me anë të Kapanarit i cili shënoi në minutën e 69-të, por Osmani e shpëtoi Skënderbeun nga humbja.
Mbrojtësi ka gjetur rrjetën në minutën e 2-të shtesë. Në “Loro Boriçi”,
edhe pse nuk e ngriti dot lojën mbi nivelin mesatar, skuadra e trajnerit Armando Cungu arriti të mposhtë Teutën në ndeshjen e parë. Autori i golit të vetëm të këtij takimi ishte Alsid Tafili.
Me një goditje fluturimthi në kufijtë e zonës, ai ndëshkoi skuadrën e trajnerit Gugsh Magani, që nuk arriti të shënonte në Shkodër, duke e vështirësuar misionin e kualifikimit. Ndërkohë, Skënderbeu arriti të barazonte vetëm në minutën e dytë të shtesës ndaj Laçit, të cilët gjetën golin e avantazhit në minutën e 69-të.
Pavarësisht këtyre dy rezultateve, sfidat e kthimit për këto çifte do të jenë vendimtare, pasi gjithçka mbetet e hapur për kualifikimin për në gjysmëfinale të Kupës së Shqipërisë. Në orën 17:00 nisin edhe dy ndeshje e para të dy çifteve të tjera çerekfinaliste.
Flamurtari pret Besëlidhjen e Lezhës, ndërsa Tirana do të ndeshet në “Selman Stërmasi” Kukësin. Për të gjithë teleshikuesit, Rrjeti i Radio-Televizionit Shqiptar do të përcjellë drejtpërdrejt emocionet e ndeshjes Tirana-Kukësi, e cila luhet në Sadiumin “Selman Stërmasi” të kryeqytetit, duke nisur nga orën 17:00.
