Ministria e Arsimit dhe e Sportit ka bërë dje në mjediset e Hotel “Doro City” trajnimin e zyrtarëve të rinj të kontrollit antidoping. Në të kanë qenë rreth 15 kandidatë, të cilët pasi kanë dëgjuar referimet e mjekut Mel Ostreni, por edhe Emil Kalimerit, Violeta Shqevit, etj., janë marrë dhe në testim. E më pas pritet certifikimi i tyre nga Agjencia Botërore e Antidopingut, ndërsa sipas përfaqësueses së Ministrisë së Arsimit dhe Sportit, Violeta Shqevi, ideja është që pranë një zyrtari të vjetër në kontrollin antidoping të jetë edhe një i ri.
“Duhet të dini që Shqipëria është pjesë e një projekti të “UNESCO”-s për kontrollin antidoping, – ka vijuar ajo. – Gjatë kësaj periudhe kemi bërë përmirësimin e paraqitjes pozitive të kontrollorëve të rinj të antidopingut, pa thënë që është bërë dhe një program i ri edukativ për antidopingun. Është bërë Kodi i ri i antidopingut, si dhe rregullorja e re e funksionimit të komisionit antidoping. Kurse kjo e djeshmja është menjëherë pas seminarit me temën “Jo doping, sport i pastër”, atje ku ishte këshilltari i Agjencisë Botërore të Antidopingut, Alesandro Donati.”
“Trajnimi i këtyre zyrtarëve të rinj të kontrollit antidoping është i mbështetur nga EE Rado (Agjencia e antidopingut të Evropës juglindore) prej së cilës kemi marrë falas jo vetëm kontrollet e antidopingut, por dhe gjithçka tjetër që lidhet me idenë e një sporti të pastër. Besojmë se shumë shpejt do të nisim dhe nga kontrollet”, – ka përfunduar Shqevi, ndërkohë që seminari i djeshëm është monitoruar jo vetëm nga drejtori i sporteve në Ministrinë e Arsimit dhe Sportit, Vladimir Gjonaj, por dhe Kryetari i Komisionit Antidoping, Klodian Allajbeu.
Ajo që duhet përmendur është fakti se sporti shqiptar, sidomos në fundvitin 2014, është goditur rëndë nga rastet e daljes së sportistëve pozitiv. Dhe raste ishin të njëpasnjëshme në peshëngritje pas Botërorit të Kazakistanit dhe Evropianit të Nën-23-vjeçarëve në Qipro. Ndaj dhe tashmë janë të gjithë në lëvizje për të qenë më vigjilent dhe të ashpër në kontrollet antidoping, sepse vetëm kështu mund të kemi një sport të pastër.
