ASNN – Spanjolli është më i shpejti në provat zyrtare, lë pas Kuartararon dhe Vinjalesin. Gara, të dielën në RTSH. Botërori i Moto GP-së zhvillon këtë fundjavë garën e 14-të të këtij sezoni, që do të mbahet në Spanjë. Dhe ai që do të niset i pari në pistën e Aragonit është vendasi Mark Markez, i cili ka qenë më i shpejti në provat zyrtare. Këto prova erdhën drejtpërdrejt në Rrjetin e Radio-Televizionit Shqiptar, i cili do të sjellë gjithashtu drejtpërdrejt edhe garën e së dielës, që nis në ora 13:00.
Mark Markezi ka siguruar, për herë të 3-të në karrierë, nisjen nga vendi i parë në pistën e Aragonit, pasi piloti vendas ka qenë më i shpejti në provat zyrtare të Çmimit të Madh të Spanjës, të zhvilluara të shtunën. Në atë që është gara e tij e 200-të, pra një garë jubilare në karrierën e tij thuajse 11-vjeçare në këtë Botëror të motorëve, 26-vjeçari do të kërkojë fitoren e 5-të në Aragon, çka do të ishte fitorja e tij e 78-të.
Tanimë që ai e ka parakaluar Majk Hejlvudin, që kishte 76 fitore, spanjolli e ka hedhur vështrimin drejt bashkëatdhetariot Anhel Nieto, që ka 90 fitore, rivalit aktual Valentino Rosi, që 115, dhe Xhakomo Agostinin, që ka 122. Kampioni në fuqi i botës dhe kryesuesi aktual i Moto GP-së, e përfundoi xhiron e tij më të shpejtë në Aragon me kohën 1 minutë, 47 sekonda e 9 të mijëtat, duke përmirësuar sadopak kohën e tij të mëparshme.
Ndonëse Fabio Kuartararo ishte mjaft më i shpejtë sesa spanjolli në dy sektorët e parë, ai ka vuajtur në vijë të drejtë në sektorin e 4-t dhe mbërrin në finish vetëm 3 të dhjetat e sekondës më vonë se Markezi dhe detyrohet të kënaqet me vendin e dytë. Rreshtin e parë të nisjes e plotëson 14:53 Q2 Maverik Vinjales, ndërsa në rreshtin e dytë do të rreshtohen Xhek Milleri, Aleiks Espargaro dhe Valentino Rosi.
Dhjetëshen e të parëve e plotësojnë Kal Kratçlou, Franko Morbideli, Joan Mir dhe Andrea Doviciozo. Prova zyrtare të së shtunës erdhën drejtpërdrejt në Rrjetin e Radio-Televizionit Shqiptar, i cili do të sjellë gjithashtu drejtpërdrejt edhe garën e së dielës, që nis në ora 13:00.
