ASNN – Tanimë është zyrtare, pasi Luis Van Gali nuk është më trajneri i Mançester Junajtid. Holandezi 65-vjeçar është parë të largohet herët nga kompleksi stërvitor i klubit anglez në Kerrington, ndërsa tanimë pritet të zyrtarizohet edhe emri i pasardhësit të tij në krye të stolit të “Djajve të kuq”, që, sipas të gjitha gjasave do të jetë Zhoze Murinjo.
Duket se fitimi i Kupës së Anglisë nuk ka arritur ta shpëtojë dot ish-trajnerin e Holandës, Bajernit të Mynihut dhe Barcelonës nga shkarkimi, pasi ai dështoi sa i përket dy fronteve madhore, titullit “kampion” në Premier Ligën Angleze dhe Ligës së Kampioneve të Evropës.
Në fillim, ishte spekuluar nga mediat britanike se Murinjo do të emërohej trajner i Mançester Junajtid, ndërsa Van Gali do të kryente rolin e drejtorit sportiv të klubit. Por, edhe për shkak të peshës së madhe që të dy trajnerët kanë në futboll, një zgjidhje e tillë nuk është gjykuar si funksionale, dhe për këtë arsye, holandezi është larguar.
Ardhja e Murinjos duket se do të çojë edhe në largimin e një tjetër figure të klubit anglez, siç ishte ndihmëstrajneri Rajën Gigs, i cili ka qenë prej 29 vjetësh tek Mançester Junajtid. Sipas të gjitha gjasave, blerja e parë e Murinjos do të jetë suedezi Zllatan Ibrahimoviç.
