ASNN – Mbrëmë janë zhvilluar takimet e radhës në Grupin G të Eliminatoreve të Botërorit “Rusi 2018”. Fillimisht Shqipëria fitoi 2-0 ndaj Lihtenshteinit, pastaj Spanja mundi 3-0 Italinë dhe Maqedonia ka surprizuar 1-0 Izraelin në shtëpinë e tij.
Tashmë Spanja udhëheq grupin me 19 pikë, duke shkuar e sigurt drejt kualifikimit, ndërsa Italia mbetet në vendin e dytë me 16 pikë. Shqipëria është në vendin e tretë me 12 pikë, Izraeli ka 9 pikë, Maqedonia 6 pikë dhe Lihtenshtejni 0 pikë.
Kjo renditje duket se po ushqen shpresat e disa entuziastëve se me rezultate pozitive në takimet e mbetura Shqipëria mund të konkurrojë për vendin e dytë. Ajo do të luajë më 5 shtator në Strumica me Maqedoninë.
Dhe traineri Panuçi, ndonëse fitoi mbrëmë me Lihtenshteinin, mendjen e ka tek takimi i të martës. Më tej në 6 tetor Shqipëria do të luajë në Spanjë dhe tre ditë më vonë pret në “Loro Boriçi” Italinë.
