ASNN – Kampionati Kombëtar i Futbollit të Femrave do të luajë këtë fundjavë javën e nëntë. Ndeshjet e kësaj javë do të luhen në të dyja ditët e fundjavës, me 3 ndeshje që do të luhen të shtunën 3 dhe 3 përballjet e tjera që do të luhen të dielën. Në ndeshjet që do të zhvillohen ditën e shtunë spikat derbi kryeqytetas ndërmjet Kinostudios dhe Tirana AS, e cila do të zhvillohet në Qendrën Sportive Kamëz.

Kinostudio, e vendit të 6-të do të kërkojë fitoren ndaj ekipit tjetër kryeqytetas, Tirana AS, që gjendet në vendin e 5-të, me një pikë më shumë se skuadra pritëse. Juban Danja do të udhëtojë drejt Fierit, në përballjen me Apoloninë e vendit të dytë, për të synuar fitoren e radhës, pas 3 pikëshit të marrë në shtëpi ndaj Skëndërbeut. Sidoqoftë, fieraket janë një “kockë e fortë” dhe pritet një ndeshje e bukur.

Lushnja e vendit të parafundit do të udhëtojë drejt qytetit juglindor të vendit, Korçë, ku do të tentojë të marrë fitoren e dytë sezonale përballë Skënderbeut në fushë të huaj. Ndërkaq, derbi shkodran Vllaznia-Akademia AAS do të zhvillohet ditën e diel në Stadiumin “Reshit Rushi”. Kampionet janë ekipi i vetëm që ka pikë të plota pas 8 javësh kampionat.

Kampionet absolute të topkëmbës së vajzave do të kërkojë fitoren e 9-të përballë rivales shkodrane, Akademia AAS, e cila gjendet në vendin e 8-të, me 9 pikë. Po të dielën, ekipi i Tiranës do të presë në Stadiumin “Skënder Halili” në kryeqytet Bilisht Sportin e vendit të fundit, ndërsa po në të njëjtën orë, Teuta do të përballet me Partizanin në aneksin e Stadiumit “Niko Dovana” të Durrësit.

Kampionati Kombëtar

i Futbollit – Femra

Java e 9-të:

Të shtunën, 23 janar 2021:

Kinostudio – Tirana AS       ora 13:00

Apolonia – Juban Danja     ora 13:00

Skënderbeu – Lushnja        ora 13:00

Të dielën, 24 janar 2021:

Vllaznia – Akademia AAS   ora 11:00

Tirana – Bilisht Sport            ora 13:00

Teuta – Partizani                   ora 13:00