ASNN – Kampionati Kombëtar i Basketbollit për Femra ka luajtur të shtunën ndeshjet e javës së tij të dytë dhe 3 skuadrat favorite për titull, kampionia në fuqi, Flamurtari, nënkampionia Goga Basket, dhe sfidantja Tirana, kanë korrur fitoren e dytë radhazi në këtë fillim sezoni.

Flamurtari nuk e ka diskutuar aspak fitoren përballë Skënderbeut, edhe pse në momente të caktuara të ndeshjes ka luajtur mjaft qetë duke i lënë hapësira kundërshtarit. Skënderbeu kërkon të bëjë diçka, por, në fund, rezultati është fiksuar në 69-54 për vlonjatet, që përsëri kërkojnë titullin “kampion”.

Ndërkohë, basketbollistet e Vllaznisë janë mundur sërish, edhe në javën e dytë të kampionatit. Mikeshat e Goga Basket, të drejtuara nga trajneri i tyre Henri Moja, janë shfaqur më të mobilizuara në fushën e lojës dhe, në përfundim, Goga Basket ka fituar 60-73 duke kryesuar me meritë kampionatin e basketbollit të femrave.

Në takimin tjetër të javës, vajzat bardheblu të trajnerit Roland Avramit kanë lënë pushim Erta e Gera Bujarin, Rezarta Hoxhajn dhe Adelajde Aliajn e vetëm me të rejat kanë triumfuar bindshëm, 100-46, përballë një skuadre të brishtë, siç është Kamza Basket, që ende kërkon forcë për t’u rritur

Së fundit, ka ardhur një fitore e papritur, 67-89, për Elbasanin ndaj Apolonisë, që sezonin e kaluar ishte një skuadër për rekorde, sepse nuk arrinte të fitonte asnjë ndeshje. E ka arritur suksesin pikërisht ndaj Apolonisë në Pallatin e Sportit në Vlorë, edhe pse pritej të ishte krejt e kundërta, pasi mendohej se fieraket do të fitonin lehtësisht.

Kampionati Kombëtar

i Basketbollit – Femra

Kategoria e Parë

Java e dytë

(22 tetor 2016)

Tirana – Kamza Basket       100-46

Flamurtari – Skënderbeu     69-54

Apolonia – Elbasani                          67-89

Vllaznia – Goga Basket        60-73

Studenti                                 pushim

Renditja

Nr.       Skuadra                     N.        F.         H.        Psh-Pp           Pikë

1. Goga Basket             2          2          0          181-112         4
2. Tirana                         2          2          0          159-104         4
3. Flamurtari                  2          2          0          138-107         4
4. Elbasani                    2          1          1          142-136         3
5. Studenti                     1          1          0            78-49            2
6. Vllaznia                     2          0          2          118-132         2
7. Apolonia                    2          0          2          119-197         2
8. Kamza Basket          2          0          2            95-178          2
9. Skënderbeu              1          0          1            54-69            1