ASNN – Nuk kanë sjellë asnjë ndryshim në renditje as ndeshjet e javës së 8-të të Kampionatit Kombëtar në Volejboll për Meshkuj, që u luajtën të shtunën, pasi ekipet e kreut kanë fituar dhe kanë mbrojtur pozitat e tyre. Kështu, kampionia në fuqi, Erzeni, fitoi 3-0 ndaj Studentit në Pallatin e Sportit “Asllan Rusi” në kryeqytet, një takim të dominuar plotësisht nga shijakasut.

Studenti rivalizoi vetëm në setin e dytë, ku tentoi të rihapë sfidën, por u dorëzua në pikët shtesë. Ndërsa pjesa tjetër e ndeshjes ishte nën kontrollin e Erzeni, që korr suksesin e 7-të në kampionat dhe mbyll ndeshjet e fazës së parë, pasi javën e ardhshme është pushim. Kreu i Erzeni kërcënohet vetëm nga Vllaznia, që ndodhet 3 pikë pas shijakasve në renditje, por shkodranët kanë edhe një ndeshje për të luajtur.

Skuadra shkodrane sot fitoi 3-1 me përmbysje në “Fahrie Hoti” ndaj Tiranës, ndeshje që nisi më mirë për kryeqytetasit. Farka Volej e trajnerit Dritan Bardhi shpresoi në një surprizë, por kjo ëndërr zgjati vetëm një set, pasi më tej në fushë komanduan miqtë shkodranë, që përmbysën shifrat. Vllaznia fitoi 3 setet e tjera dhe korri suksesin e 6-të në po kaq takime të luajtura dhe synon ta mbyllë fazën e parë në krye.

Të shtunën e ardhshme, ajo pret në Shkodër Skënderbeun, i cili vijon ecurinë e mirë i dhe mundi të shtunën Partizanin 3-2. Dy ekipe rivale këto, me korçarët që, me këtë fitore hedhin një hap të rëndësishëm drejt “play off”-it, aty ku Partizani, finaliste e mundur e sezonit të shkuar, rrezikon të mos arrijë. Jashtë fushe fiton Elbasani, që mundi 3-0 Teutën në Durrës, në atë që ishte suksesi i parë në kampionat për miqtë.

Në fushë u përballën dy ekipe që nuk kishin asnjë pikë e fitore deri më sot, por në fund të takimit festojnë miqtë nga Elbasani. Një ndeshje në përgjithësi e komanduar nga skuadra mike, që pati një epërsi të lehtë në të trija setet, duke e merituar fitoren dhe i largohet vendit të fundit. Pa asnjë fitore sërish Teuta, që prej më shumë se një viti nuk arrin të gjejë rrugën drejt suksesit.

Kampionati Kombëtar

i Volejbollit – Meshkuj

Java e 8-të

(17 nëntor 2018)

Skënderbeu – Partizani       3-2

(21-25, 25-21, 25-22, 22-25, 15-13)

Farka Volej – Vllaznia          1-3

(25-21, 13-25, 22-25, 18-25)

Teuta – Elbasani                   0-3

(21-25, 16-25, 23-25)

Studenti – Erzeni                  0-3

(14-25, 24-26, 23-25)

Tirana                                     pushim

Renditja:

Nr.       Skuadra         N.        F.         H         Pikë

1. Erzeni                        8          7          1          22
2. Vllaznia         7          7          0          19
3. Tirana             7          5          2          15
4. Skënderbeu  7          5          2          15
5. Partizani        7          3          4          10
6. Studenti         7          3          4            9
7. Farka Volej    7          1          6            3
8. Elbasani        7          1          6            3
9. Teuta              7          0          7            0