ASNN – Në kuadër të javës së 5-të të Grupi A1 të Kampionatit Kombëtar të Volejbollit për Femra, në kryeqytet u luajt një prej ndeshjeve më të bukura e më të forta të këtij edicioni, dueli mes Partizanit dhe Mirditës. Në Pallatin e Sportit “Asllan Rusi” në Tiranë, skuadra e kuqe shihej favorite, por nuk rezultoi kështu, sepse vajzat e skuadrës mirditore bënë një ndeshje të shkëlqyer dhe fituan me rezultatin e thellë 3-0, duke u konfirmuar si një nga skuadrat pretendente.

Seti i parë ishte domethënës në këtë rrugëtim të ndeshjes, sepse miket nga Mirdita e fituan me shifrat 18-25, pastaj fituan të dy setet në vijim me të njëjtat shifra: 19-25. Pra një fitore e thellë 3-0 e Mirditës, që, edhe pse është rikthyer vetëm këtë sezon në nivelin më të lartë të volejbollit shqiptar të femrave, ngjitet në vendin e dytë në renditje, pas Tiranës. Kjo e fundit regjistroi dje një fitore të lehtë e pa shqetësime në Korçë përballë Skënderbeut, me rezultatin 3-0.

Natyrisht, Tirana është skuadra favorite për titullin dhe është në pozita mjaft komode, sepse në 5 javë të luajtura ka 5 fitore dhe pikë të plota në klasifikim. Korçaret nuk patën forcën dhe zgjuarsinë për të bërë befasinë në këtë përballje, duke iu dorëzuar kështu Tiranës. 19-25, 15-25 dhe 19-25 ishin shifrat e seteve që i dhanë fitoren ekipit të trajnerit veteran, Ardian Gorenxës. Me rezultatin 3-0 fitoi edhe Barleti Volej, i cili mundi në Durrës ekipin e Teutës.

16-25 përfundoi seti i parë, ndërsa dy setet e tjerë përfunduan me shifrat e njëjta 19-25. Një fitore e merituar e Barleti Volejit, që ngjitet në vend të tretë. Një fitore spektakolare regjistroi të shtunën edhe Vllaznia, e cila mundi në Krutje Lushnjën me rezultatin 3-2. Ishte një nga ndeshjet më të bukura të kësaj jave, për shkak të rivalitetit dhe emocionit që prodhoi, ndonëse duhet theksuar se të dyja skuadrat morën pikët e para të këtij sezoni, përkatësisht dy për shkodranët dhe një për myzeqarët.

Kampionatit Kombëtar

i Volejbollit – Femra

Grupi A1

Java e 5-të

Të shtunën:

Lushnja – Vllaznia               2-3

(20-25, 25-22, 15-25, 25-19, 7-15)

Skënderbeu – Tirana           0-3

(19-25, 15-25, 19-25)

Teuta – Barleti Volej             0-3

(16-25, 19-25, 19-25)

Partizani – Mirdita                 0-3

(18-25, 19-25, 19-25)

Renditja

Nr.       Skuadra         N.        F.         H.        Pikë

1. Tirana             5          5          0          15
2. Mirdita            5          4          1          13
3. Barleti Volej   5          4          1          12
4. Partizani        5          3          2            8
5. Teuta             5          2          3            6
6. Skënderbeu 5          1          4            3
7. Vllaznia         5          1          4            2
8. Lushnja         5          0          5            1