ASNN – Janë luajtur dje ndeshjet e para të gjysmëfinaleve të “play-off”-eve për titullin “kampion” të Kampionatit Kombëtar të Basketbollit për Meshkuj dhe Teuta ka shtangur Kamza Basket, duke fituar në fushën e kësaj të fundit, ndërsa Vllaznia nuk ka gabuar në shtëpi përballë Tiranës. Fituesit në fuqi të Superkupës dhe Kupës së Shqipërisë janë përshëndetur nga Kryetari i Bashkisë, Xhelal Mziu.
Madje kanë bërë dhe foto me trofeun, por Teuta bën surprizën më të madhe të “play-off”-it, duke fituar 80-74. Ndoshta duke e menduar të fituar ndeshjen, Kamza Basket është tronditur në fushën e vet nga Teuta, e cila ka bërë ndeshjen më të mirë të saj. Tashmë për përmbysje i duhet shumë punë trajnerit Adem Muhametaj dhe lojtarëve të tij.
Kjo, sepse në radhë të parë duhet të fitojnë të shtunën në Durrës për të menduar kthesën më 18 maj 2016. Meritë e padiskutueshme e durrsakëve, që duket se kanë pritur fundin e sezonit për të vërtetuar se e kanë merituar daljen e tyre në “play-off”-in për titull. Ndërkohë, 81-63 në favor të Vllaznisë ka përfunduar sfida e parë e gjysmëfinales tjetër të “play-off”-it ndaj Tiranës.
Një fitore që, nisur nga ajo që u pasqyrua në fushën e lojës, ishte plotësisht e merituar nga ana e vendasve, të cilët falë asaj forme të shkëlqyer duket se jo vetëm që kanë hedhur hapin e parë serioz drejt kualifikimit, por në të njëjtën janë duke shpalosur hapur pretendimet për të bërë të tyrin trofeun e titullit “kampion”. Ndeshjet e dyta të gjysmëfinaleve, luhen të shtunën, më 14 maj 2016.
Kampionati Kombëtar
i Basketbollit – Meshkuj
Kalendari i “play-off”-it
për titull kampion
Superliga
Gjysmëfinalet:
11 maj 2016:
Kamza Basket – Teuta 74-80 (0-1)
(12-19, 21-21, 15-23, 26-16)
Salla Sportive, Bathore
Vllaznia – Tirana 81-63 (1-0)
(21-13, 16-17, 20-15, 25-18)
Pallati i Sportit “Qazim Dervishi”, Shkodër
14 maj 2016:
Teuta – Kamza Basket ora 19:00
Pallati i Sportit “Ramazan Njala”, Durrës
Tirana – Vllaznia ora 19:00
Salla Sportive “Fahrie Hoti”, Tiranë
18 maj 2016:
(nëse do të jetë e nevojshme)
Kamza Basket – Teuta ora 19:00
Salla Sportive, Bathore
Vllaznia – Tirana ora 19:00
Pallati i Sportit “Qazim Dervishi”, Shkodër
