ASNN – Pas barazimit pa gola të premten në ndeshjen e parë, atë midis Teutës dhe Partizanit, janë luajtur sot pasdreke dy ndeshje të tjera të javës së 21-t të Kategorisë Superiore dhe sulmuesi shkodran Hamdi Salihi, ka qenë sërish vendimtar në fitoren e radhës të Skënderbeut, që këtë herë mposhti 1-0 Laçin.

Korçarët e dominuan totalisht takimin e zhvilluar në stadiumin e tyre, por arritën të shënojnë vetëm një gol, ku Salihi shfrytëzoi maksimalisht një krosim në minutën e 21, duke vulosur në 1-0 rezultatin e këtij takimi. Me këtë fitore, Skënderbeu ngjitet përkohësisht në vendin e dytë.

Korçarët janë me vetëm një pikë diferencë nga Kukësi i vendit të parë, që do të luajë sonte ndaj Tiranës në kryeqytet. Ndërkohë, në takimin tjetër të luajtur pasdreke, Vllaznia mori një fitore të bukur me përmbysje ndaj Flamurtarit, me rezultatin 3-2. Flamurtari shënoi me anë të Bushiç në pjesën e parë dhe krijoi edhe disa raste të tjera.

Por nuk arriti të mbyllte ndeshjen. Nga ana tjetër, Vllaznia qëndroi në sulm gjatë gjithë kohës dhe u shpërblye me Hebajn në minutën e 76-të. Shkodranët gjetën sërish rrjetën në minutën e 90-të, kur Bakaj shënoi atë që mendohej se do të ishte goli i një fitoreje të shkëlqyer.

Por vetëm pak sekonda më vonë, Bushiç ndëshkoi përsëri ish-ekipin e tij, duke barazuar shifrat. Megjithatë, në minutën e 3-të shtesë, një harkim nga e majta gjen Pjeshkën në zonë dhe futbollisti i ri godet me kokë, duke shënuar golin e fitores që largon Vllazninë nga fundi i renditjes, ndërsa e mban Flamurtarin në zonën e rrezikut.