ASNN – Kategoria e Parë ka luajtur të shtunën ndeshjet e tjera të javës së 3-të dhe Apolonia dhe Bylisi janë ndarë me rrjeta të paprekura, në takimin e luajtur në Stadiumin “Loni Papuçiu” të Fierit. Sikundër takimi Vllaznia-Dinamo të premten, edhe ndeshja e së shtunës midis fierakëve dhe ballshiotëve, u soll për sportdashësit drejtpërdrejt nga Rrjeti i Radio-Televizionit Shqiptar.

Niveli i dytë i Kampionatit Kombëtar të Futbollit, që njihet si Kategoria e Parë, ka luajtur të shtunën 7 nga ndeshjet e javës së 3-të të tij, ndërsa dy takimet e fundit luhen të dielën. Në fakt, kjo javë ka nisur të premten pasdite me takimin midis Vllaznisë dhe Dinamos, që u fitua nga shkodranët me rezultatin 2-0 dhe u soll për sportdashësit drejtpërdrejt dhe ekskluzivisht nga Rrjeti i Radio-Televizionit Shqiptar.

Në takimet e tjera të grupit A, apo grupit të Veriut, të luajtura të shtunën skuadra e Besëlidhjes mori një fitore 2-1 ndaj Veleçikut të Koplikut. Ndërsa Erzeni arriti të administronte mirë rezultatin e arritur në pjesë të parë duke marrën një fitore 1-0 ndaj Burrelit. Ndërsa skuadra e Ilirisë nuk ka arritur që të shkojë më tepër se sa një barazim 1-1 me skuadrën e Vorës, e cila shënoi në minutat e fundit.

Ky grup e mbyll të dielën javën e 3-të me duelin Shënkolli-Korabi. Ndërkaq, në grupin B, Në Grupin B, sfida midis Apolonisë së Fierit dhe ballshiotëve të Bylisit, që u soll të shtunën për sportdashësit drejtpërdrejt dhe ekskluzivisht nga Rrjeti i Radio-Televizionit Shqiptar, ka përfunduar në rezultatin e barabartë 0-0. Në ndeshjet e tjera të këtij grupi, Oriku arriti të fitojë përballë Pogradecit me anë të një goli të shënuar në minutat shtesë.

Ndërsa Egantia nuk shkoi më shumë se sa një barazim pa gola kundër Lushnjës. Në derbin e prefekturës, Turbina e Cërrikut mundi me meritë skuadrën e Elbasanit me rezultatin 2-1. Takimi i fundit i kësaj jave është ai që do të luhet të dielën në Berat midis Tomorit dhe Besës, që do të sillet gjithashtu për sportdashësit drejtpërdrejt dhe ekskluzivisht nga Rrjeti i Radio-Televizionit Shqiptar.

Kategoria e Parë

Java e 3-të

Grupi A

Të premten:

Vllaznia – Dinamo                            2-0

Të shtunën:

Besëlidhja – Veleçiku i Koplikut    2-1

Erzeni – Burreli                                 1-0

Vora – Iliria Fushë-Krujë                 1-1

Të dielën:

Shënkolli – Korabi                            (16:00)

Grupi B

Të shtunën:

Oriku – Pogradeci                             1-0

Egnatia – Lushnja                            0-0

Turbina – Elbasani                           2-1

Apolonia – Bylisi                               0-0

Të dielën:

Tomori – Besa                                   (16:00)