ASNN – Verder Bremeni, fitore me aromë mbijetese ndaj Shalke 04-ës, e shtuna, dita e udhëtueseve. Të shtunën, duke nisur nga ora 15:30, janë luajtur 4 ndeshjet e tjera të javës së 29-të të Bundesligës gjermane. Takimi më i spikatur ka qenë ai midis Shalke 04-ës, që gjendet në mesin e renditjes, dhe Verder Bremenit, që dergjet në zonën e ftohtë të rënies nga kategoria. Ky takimi u fitua nga Verder Bremeni me një gol të vetëm.
Kështu, pas takimit të hapjes, të luajtur të premten dhe ku Bajer Leverkuseni ka fituar me një gol të vetëm në fushën e Fraiburgut, të shtunën, duke nisur nga ora 15:30, janë luajtur 5 ndeshjet e tjera të javës së 29-të të Bundesligës gjermane. Takimi më i spikatur ka qenë ai midis Shalke 04-ës, që gjendet në mesin e renditjes, dhe Verder Bremenit, që dergjet në zonën e ftohtë të rënies nga kategoria. Në fakt, përballja e luajtur në stadiumin 62,000 vendësh “Arena Auf Shalke” të Gelsenkirshenit ka dhuruar një pjesë të parë që është karakterizuar nga një nisje e ngadaltë.
Dhe, vetëm pas thuajse një çerekore lojë do të vijë rasti i parë për Verderin. Skuadra mike do ta mbizotërojë lojën në këtë 45-minutësh të parë dhe do të arrijë të gjejë edhe golin e epërsisë. Në të 32-tën minutë, Rashica do të pasojë për Bitekortin, i cili do të godasë mjeshtërisht në kufijtë e zonës dhe do të përshëndesë rrjetën. Një goditje me kokë, por e shkuar dëm, që erdhi pas thuajse 35 minutash lojë është shumë pak për skuadrën vendase, ndërsa Bremeni e mbyll pjesën e parë duke rrezikuar dhe në epërsi.
Pjesa e dytë ka parë Shalke 04-ën më kërkuese në lojë dhe më të rrezikshme në drejtim të portës mike, por pa e gjetur dot rrugën e rrjetës. Verder Bremeni nga ana e saj ka synuar të gjejë edhe një gol tjetër dhe ka patur mundësi në fund, por sidoqoftë është mjaftuar me një fitore minimale, që e mban në vallen e mbijetesës. Ndërkaq, në 3 takimet e tjera të pasdites së të shtunës, Hertha ka fituar 2-0 në Berlin ndaj Augsburgut, Mainz 05-sa është mundur minimalisht në fushën e vet përballë Hofenhaimit, ashtu sikundër është mundur në fushën e vet edhe Volfsburgu, 1-2 përballë Eintrahtit të Frankfurtit.
