ASNN – Në kuadër të periudhës përgatitore dimërore, Luftëtari ka luajtur miqësoren e parë, teksa në fushën e vjetër ka pritur skuadrën e Kategorisë së Dytë, Memaliaj. Ndeshja është luajtur në një terren të rrëshqitshëm për 90 minuta, ndonëse fusha tashmë është rikonstruktuar. Edhe pse ishte një ndeshje miqësore të dyja skuadrat kanë krijuar një volum të madh loje.
Memaliaj, edhe pse kishte mungesa, u mundua të ekuilibronte lojën me gjirokastritët. Vendësit krijuan disa raste të pastra shënimi, ndërsa në 20 minutat e para të lojës kanë qenë tre herë pranë golit. Por e gjejnë atë vetëm në minutën e 22-të, gjirokastritët me anë të Tahirllarit, i cili ka realizuar pas kombinimit që ka ardhur midis Mersinit dhe Dukës.
Miqtë janë kundërpërgjigjur dhe në të 30-n minutë dhe i kanë pasur të gjitha mundësitë për të barazuar me anë të Kosta Aliajt. Dy minuta para përfundimit të pjesës së parë, Qejvani është frenuar nga shtylla, teksa e meritonte të shënonte golin e dytë për Luftëtarin. Pjesa e dytë ka nisur me zëvendësime për të dyja skuadrat, ndërsa në minutën e 66-të, Qejvani ka shënuar dhe golin e dytë.
Në fundin e ndeshjes, Sako do të shënonte golin e vetëm për Memaliajn dhe në përfundim 2-1. Miqtë kanë pasur kontestimet e tyre dhe për një 11-metërsh që, sipas tyre, gjyqtari nuk ua dha. Në javën finale të periudhës përgatitore dimërore pritet që të ketë dhe të tjera miqësore për gjirokastritët e Luftëtarit.
Luftëtari – Memaliaj 2-1
Shënues: Tahirllari 22’, Qejvani 60’ / Shehu 85’
Luftëtari: Thano, Rexha, Dosti, Frashëri, Zholi, Çaço, Shenaj, Qejvani, Duka, End. Mersini, Tahirllari. Trajner: B. Devolli. U aktivizuan: Birja, Brahimi, Këndella, Biraçi, Gaba, Hima, Dorbi, Kazma
Memaliaj: Mustafaj, Çaushi, Gashi, Hima, Bilaj, Mema, Aliaj, Hala, K. Shehu, Lika, Sako Trajner: A. Zhupa. U aktivizuan: Myrtaj, Muça, Hysesani, D. Shehu, Kucaj
Gjyqtarë: R. Shoshaj, E. Nelaj, K. Hoxha (Gjirokastër)
