ASNN – Disfata 1-5 me Kastriotin të dielën, solli dorëheqjen e trajnerit Gentian Mezani, i cili pas ndeshjes thumboi tërthorazi klubin duke thënë se me këtë grup, Luftëtari nuk mund të mbijetonte në Kategorinë Superiore. Këto deklarata nxituan largimin e tij sepse presidenca e klubit nuk e pa të përshtatshme një qëndrim të tillë.
Ndërkohë, klubi gjirokastrit nuk ka humbur kohë dhe ka emëruar trajnerin e ri. Pikërisht sot, Luftëtari emëroi zyrtarisht Julian Ahmatajn në krye të bluzinjve, me shpresën se trajneri elbasanas do ta mbajë Luftëtarin në elitë. Në fakt, Ahmataj nuk ka shumë eksperiencë si trajner.
Por në një moment që u ftua të testonte veten tek Kamza në fund të sezonit të shkuar, ai arriti të mbante në Superiore ekipin kamzali e në fund, për habi të të gjithëve, e shkarkuan. Ahmataj do të gjejë një skuadër të çorganizuar, pa shumë element cilësorë dhe gjatë gjithë kohës të ekspozuar ndaj krizës financiare.
Largimi i lojtarëve cilësorë si Rrocaj dhe Shkurtaj ka sjellë rënien e cilësisë së grupit dhe Luftëtari e vërtetoi edhe ndaj Kastriotit se ka mangësi dhe pafuqi për të përballuar rivalët, kështu që Ahmataj do ta ketë të vështirë ta mbajë këtë skuadër në Kategorinë Superiore.
