ASNN – Koha e mirë dhe me diell ka kthyer Luftëtarin në fushën e stadiumit të Gjirokastrës për një seancë stërvitore. Në të kanë rënë në sy mungesat e disa lojtarëve në stërvitje, paçka se Devolli ka zhvilluar një ndeshje brenda grupit. Dy ditë më parë është dëmtuar Julian Lluka, i cili sipas mjekut të skuadrës, Bledar Late, mund të qëndrojë disa javë larg fushave të blerta. Mungesat e tjera, që janë Duka, Çunaj, Frashëri, janë dëmtime të lehta. Që do të thotë se do të jenë të gatshëm javën që vjen për ndeshjen ndaj Tomorit në Berat.
Të tre këta futbollistë do t’i bashkohen grupit të hënën, atëherë kur të nisin dhe përgatitjet për Tomorin. Ndërkohë stërvitje të diferencuar ka bërë dhe mbrojtësi Sulejmani, i cili e ka kaluar dëmtimin dhe shumë shpejt do të jetë i gatshëm për trajnerin Devolli. E duke parë këto mungesa, Devolli ka aktivizuar këtë formacion, i cili përbëhej nga Thano, Rexha, Brahimi, Batha, Erg. Mersini, End. Mersini, Shenaj, Biraçi, Qejvani, Aliaj dhe Nelaj. Gjatë zhvillimit të ndeshjes së kontrollit, i pari i pankinës së Luftëtarit e ka ndërprerë disa herë lojën, atje ku i ka këshilluar lojtarët për pozicionet në fushë.
Madje është ndalur gjatë dhe tek dyshja sulmuese Nelaj-Aliaj, të cilët nuk i kanë shfrytëzuar si duhet rastet për shënim, teksa kanë pasur mungesë finalizimi. Madje duke parë që sulmi nuk po ecte si duhej, Devolli ka veshur dhe jelekun e ka luajtur vetë, ndërsa i ka nxjerrë sulmuesit disa përpara portës kundërshtare. Dhe ndeshja e kontrollit e djeshmja ka treguar se Luftëtari ka shumë punë për të rregulluar për t’u kthyer në atë ekip që e presin të gjithë për ta parë në fushën e lojës. Pra një skuadër të denjë për Superiore.
Lojtarët nuk e treguan nivelin e tyre më të mirë, ndërsa në fakt i pret një transfertë e vështirë si ajo e Beratit. Gjirokastritët u janë dhënë dy ditë pushim, ndërsa të hënën të gjithë kthehen në stërvitje.
