ASNN – Një “ish” sfidon blutë e Mehmetit dhe si pjesë e gjirokastritëve kërkon fitoren e parë të sezonit: “Ndoshta kam luajtur pak sezonin e kaluar, por Dinamo do të marrë atë që ka pësuar vjet”. Vëmendja e bluzinjve të Bledar Devollit tashmë është e tëra e përqendruar tek ndeshja e javës së parë të kampionatit, e cila të shtunën do të luhet në Gjirokastër, atje ku Luftëtari do të presë Dinamon. Ajo që është e sigurt është se sportdashësit gjirokastritë do të dinë të tregojnë vlerat e tyre qytetare, kulturën, ndërsa sjellja e tyre në shkallët e stadiumit do të jetë shembullore.
Duke e bërë kështu më normale mbarëvajtjen e ndeshjes së parë të kampionatit, që në fakt konsiderohet i vështirë nga bluzinjtë. Megjithatë të besuarit e Bledar Devollit, edhe për atë se kanë punuar mbi dy muaj për këtë sezon, do të dinë ta kalojnë me sukses këtë sfidë, ndërsa kështu do të dinë t’i bëjnë një hapje të bukur këtij sezoni. Sipas mesfushorit Julian Lluka, i cili në mungesë të kapitenit Fejzo Shenaj dhe zëvendësit të tij, Besmir Sinani, të cilët janë të dëmtuar, ndeshja me Dinamon është e vështirë. Dhe duke qenë se Lluka do të mbajë dhe shiritin e kapitenit, atëherë ai kërkon t’i japëi më shumë besim skuadrës.
“Çdo fillim sezoni ka emocionet e veta, pasi është edhe ndeshja e parë dhe për këtë të gjithë mendojmë ta nisim mbarë, – ka deklaruar ai për gazetat sportive të ditës. – Duke u nisur edhe nga kundërshtari që kemi përballë mendoj se do të jetë një ndeshje e vështirë. Gjithmonë kjo duke u bazuar tek emri që ka kundërshtari në futbollin shqiptar, apo dhe tek trofetë që ka marrë. Mirëpo kjo nuk do të thotë që janë të pakalueshëm. Përkundrazi kjo ndeshje, edhe pse në letër është e vështirë, do të jetë krejtësisht e kalueshme për ne.”
“Ndoshta Luftëtari ka më pak trofe se sa Dinamo, por këtë sezon ka një skuadër më të kompletuar, më me shumë elementë cilësor, e cila e meriton të jetë në Kategorinë Superiore kampionatin e ardhshëm, – ka vijuar mesfushori i gjirokastritëve. – Dhe që të arrihet kjo duhet të kesh dhe një buxhet të mjaftueshëm, që në fakt për skuadrën tonë nuk mungon. Financat janë të garantuara nga drejtuesit dhe kjo duket dhe nga fakti i blerjes së lojtarëve cilësor për skuadrën. Dhe kur ke financat e shëndosha, apo dhe skuadrën, nuk ka pse të mos realizohen objektivat.”
“Unë ndoshta kam luajtur pak sezonin e kaluar, por Dinamo do të marrë atë që ka pësuar dhe sezonin e kaluar. Me bindje të plotë ne jemi favorit dhe me mbështetjen e tifozëve do të jemi ne fitues, ndërsa e meritojmë ngjitjen në Superiore”, – ka përfunduar futbollisti i Luftëtarit, Julian Lluka.
