ASNN – Të dielën u luajt dhe ndeshja e tjetër e javës së 18-të të Kategorisë Superiore, Luftëtari-Partizani, e luajtur në stadiumin e Gjirokastrës. Ky duel i rëndësishëm përfundoi në barazim 1-1. Ishte një ndeshje ku në fillim shënuan miqtë nga Tirana me anë të talentit Esat Mala, i cili realizoi në minutën e 36-të. Pjesa e parë do të mbyllej 0-1 në favor të të kuqve kryeqytetas, por në pjesën e dytë gjërat do të ndryshonin shpejt. Pa kaluar 10 minuta nga nisja e fraksionit të dytë të lojës realizoi Ymeraj për Luftëtarin, duke sjellë baraspeshimin e lojës dhe të rezultatit.

Me këtë rezultat, pra 1-1, u mbyll krejt ndeshja. Luftëtari mori një pikë dhe u barazua me Tiranën në 17 pikë, duke e bërë garën e mbijetesës mjaft të konkurruar. Ndërsa Partizani mori, gjithashtu, një pikë dhe shkoi në 37 pikë. Ruan kreun e renditjes, por tani i kërcënuar nga rivalët që janë afruar ndjeshëm, sidomos Kukësi dhe Teuta që kanë 34 dhe 33 pikë. Sidoqoftë, Partizani shpallet edhe matematikisht “kampion dimri”, sepse e mbyll gjysmën e parë të sezonit në vend të parë. Ndërkaq, të premten janë zhvilluar dy ndeshjet e para të javës së 18-të të Kategorisë Superiore të Kampionatit Kombëtar të Futbollit.

Tirana rikthehet të shkëlqejë dhe të fitojë. Skuadra e drejtuar nga Ardian Mema fitoi në shtëpi 1-0 përballë Flamurtarit, duke e mbyllur vitin 2018 me fitore. Bardheblutë kanë zhvilluar një lojë bindëse përballë një Flamurtari që dukej sikur ishte futur në fushën e lojës për të marrë 1 pikë. Rastet e shumta të krijuara nga bardheblutë u kurorëzuan vetëm në minutën e 87-të pas golit të shënuar nga Edon Hasani. Një fitore që e ngjit Tiranën në kuotën e 17 pikëve. Ndërkohë Skënderbeu vijon rënien e lirë. Skuadra e Orges Shehit, regjistroi humbjen e 4-t rradhazi duke u mundur dhe nga Kamza.

Ernest Gjoka arriti kështu fitoren e parë në krye të Kamzës, falë golit të Masato Fukuit në minutën e 43-të. Java e 18-të e Kategorisë Superiore vijoi të shtunën pasdreke me takimin Teuta-Laçi që u mbyll në barazim 1-1, ndërsa Kukësi fitoi të dielën 2-0 ndaj Kastriotit. Edhe pas kësaj jave konfirmohet se ka dy grupe, një që lufton për titull e tjetri që lufton për mbijetesë. Në grupin e fundtabelës ka 4 ekipe që luftojnë për mbijetesë, por këtë herë me Kastriotin që ka pësuar disfata të rënda dhe ndodhet 5 pikë larg Kamzës së vendit të parafundit.

Kurse në grupin e kreut ka 6 skuadra, ku diferenca mes Partizanit kryesues dhe Flamurtarit të vendit të gjashtë është 9 pikë. E thënë ndryshe, rivaliteti është i fortë dhe gara për titull është e hapur. Këtë e mundëson jo vetëm rivaliteti i fortë, por edhe formula e kampionatit ku ka shumë ndeshje direkte midis ekipeve pretendente.

Kategoria Superiore

Java e 18-të

Të premten, 14 dhjetor 2018:

Kamza – Skënderbeu          1-0

Tirana – Flamurtari               1-0

Të shtunën, 15 dhjetor 2018:

Teuta – Laçi                           1-1

Të dielën, 16 dhjetor 2018:

Luftëtari – Partizani              1-1

Kukësi – Kastrioti                  2-0

Renditja

Nr.       Skuadra         N.        F.         B.        H.        Gsh-Gp          Pikë

1. Partizani        18        11        4            3        19-98              37
2. Kukësi            18        10        4            4        18-9                34
3. Teuta              18          9        6            3        24-13              33
4. Skënderbeu  18          9        3            6        20-13              30
5. Laçi                 18          8        6            4        16-13              30
6. Flamurtari      18          8        4            6        15-12              28
7. Tirana             18          4        5            9        19-21              17
8. Luftëtari         18          5        2          11        15-21              17
9. Kamza            18          4        3          11          9-20              15
10. Kastrioti 18          3        1          14        11-35              10