ASNN – Trajneri: “Do të kompensojmë humbjet që kemi pësuar në fushën tonë në dy javët e para”. Gjirokastritët do të kenë nga pas dhe tifozët me shpresën se do të kthehen triumfues. Pas fitores me një lojë bindëse me Bylis të Ballshit, një javë më parë, trajnerit gjirokastrite Bledar Devolli tashmë i ka ardhur oreksi dhe kërkon të vazhdojë ecurinë e fitoreve dhe në fushën e vështirë të Pogradecit. Nëse më parë ekzistonte bindja se edhe me një barazim mund të ishin të kënaqur, tashmë gjithçka ka ndryshuar, ndërsa Devolli këmbëngul se humbjet me Dinamon dhe Sopotin në Gjirokastër nuk kanë qenë veprim logjik i asaj që është prodhuar në fushë nga skuadra.
Ai ka besim se skuadra do të ndryshojë, ndërsa para nisjes për në Pogradec, atje ku skuadra ka kaluar mbrëmjen e së premtes, trajneri Bledar Devolli për gazetat sportive të ditës do të deklaronte: “Kemi një ndeshje të vështirë pasi Pogradeci ka një “ekipi fushe”, me një grup futbollistësh që kanë 2-3 vite që luajnë së bashku dhe kjo u jep mundësinë të prodhojnë në fushën e lojës duke u hapur probleme kundërshtarëve. Ne kemi punuar gjatë gjithë javës për mënyrën se si do të luajmë. Do të zhvillojmë lojën tonë me besim se do të fitojmë. Pas fitores me Bylis të Ballshit, atje ku manifestuam një lojë të bukur. Dhe pas këtij suksesi në skuadër mbizotëron tjetër frymë.”
“Nuk është vetëm dëshirë, por edhe objektiv për të marrë tre pikë në këtë ndeshje, – ka vijuar ai. – Kjo edhe për kompensim të humbjeve që pësuam në fushën tonë. Grupin e futbollistëve e kam të plotë, me përjashtim të Shehajt që është i skualifikuar dhe kjo na shton besimin në fitore”, përfundon deklarimin e tij, trajneri gjirokastrit Bledar Devolli. Në përballjen e sotmë Pogradeci-Luftëtari pritet të jetë një grupim i tifozërisë gjirokastrite pa marrë parasysh distancën e largët me bindjen se Luftëtari do të zhvillojë një lojë të bukur dhe me pikësynim fitoren.
Formacioni i mundshëm i Luftëtarit në ndeshjen ndaj Pogradecit do të jetë: Birja, Frashëri, Rexha, Çunaj, Erg,Mersini, Çaço, Shenaj, Duka, End.Mersini (Lluka), Qejvani, Nelaj.
