ASNN – Mesfushori i bluzinjve shpreh bindjen e tij se skuadra tashmë do të ketë dhe më shumë motivim: “Kthimi i Dukës, Llukës dhe Sulejmanit jo vetëm që plotëson skuadrën, por dhe na bën më të fortë”. Duke folur për gazetat sportive të ditës, mesfushori i Luftëtarit, Ervis Çaço, do të deklaronte: “Barazimi i marrë në vizitën pogradecare na ka mobilizuar të jemi më aktiv në ndeshjet e ardhshme. Luftëtari në dy ndeshjet e fundit ka treguar se është një nga ekipet më të mira në grupin e Jugut.”
“Në Pogradec, Luftëtari ka humbur shumë raste, të cilat po t’i kishte shfrytëzuar maksimalisht atëherë do të kishte ardhur në Gjirokastër me tre pikë të plota, – ka vijuar ai. – Megjithatë ne jemi skuadër që nuk largohemi nga objektivi, që do të thotë se kërkojmë ngjitjen në Superiore. Jemi duke menduar që tani për ndeshjen e radhës me Naftëtarin dhe në të do të tregojmë se Luftëtari ka potencial për t’u ngjitur në Kategorinë Superiore.”
“Që do të thotë se nuk do ta diskutojmë fitoren në përballjen me kuçovaret, – ka premtuar mesfushori i skuadrës gjirokastrite. – Edhe pse e nisëm kampionatin me tre humbje të jeni të sigurt që tani e tutje do të shihni një tjetër Luftëtar, i cili do të jetë krejtësisht ndryshe nga ndeshjet e para të këtij sezoni. Pavarësisht se jemi poshtë në renditje, mendoj se për Luftëtarin tani nis “malorja”, ndërsa do të tregojmë se jemi skuadër që nuk njohim kundërshtar.”
“Ne e dimë që Naftëtari, edhe duke qenë se luan për mbijetesë, do të na hapi punë. Por ne nuk do të bëjmë më gabimet e ndeshjeve të para. Rikuperimi i Dukës, Llukës dhe Sulejmanit do ta bëjë Luftëtarin jo vetëm një skuadër më të plotë, por që të buzëqeshë përballë Naftëtarit. E theksoj dhe një herë, ne nuk do ta diskutojmë fitoren me kuçovarët”, – ka përfunduar futbollisti i Luftëtarit, Ervis Çaço.
