Lojërat Olimpike do të vijnë për të gjithë teleshikuesit sportdashës ekskluzivisht në Radio Televizionin Shqiptar. Drejtori i Departamentit të TVSh Pano Xhixho ka sqaruar se ky eveniment do të transmetohet drejtpërsëdrejti çdo ditë në RTSH HD, RTSH Sport 1 dhe RTSH Sport 2.

I ftuar në edicionin informativ të orës 16:00 në Televizionin Shqiptar, drejtori i departamentit të sportit në TVSH, Pano Xhixho ka folur rreth Lojërave Olimpike dhe transmetimit të tyre ekskluziv nga TVSH. Xhixho tha se edhe pse transmetimet sportive në Televizionin Shqiptar për këtë verë nuk kanë ndaluar, transmetimi i Lojërave Olimpike është një risi që do të vijë për teleshikuesit në tre kanale.

Xhixho ka folur edhe për ekipin shqiptar që na përfaqëson duke thënë se edhe pse kemi një përfaqësim minimal me vetëm 6 sportistë, pritshmëritë janë të mëdha veçanërisht për pjesëmarrjen e atletes Luiza Gega. Lojërat Olimpike mund të ndiqen ekskluzivisht në RTSH HD, RTSH Sport 1 dhe RTSH Sport 2 cdo ditë, në tre disiplina të ndryshme.