ASNN – Liverpuli dhe Sevilja do të përballen sonte me njëra-tjetrën në finalen e madhe për trofeun e dytë të futbollit kontinental të klubeve, Ligën e Evropës. Kjo finale, që do të zhvillohet sonte në stadiumin e Bazelit dhe do të nisë në orën 20:45, do të sillet për sportdashësit drejtpërdrejt nga Rrjeti i Radio-Televizionit Shqiptar.

I gjithë kontinenti i vjetër do t’i ketë sonte sytë drejt Bazelit në Zvicër, në Stadiumin “Sent Jakob-Park”, aty ku veprimtaria e dytë e klubeve të kontinentit, Liga e Evropës, luan sonte aktin final të këtij sezoni. Fituesja në fuqi, Sevilja, do të kërkojë kërkojë mbrojtjen e trofeut, ndërsa Liverpuli kthimin e lavdisë.

Jurgen Klopi po e shijon jetën e re te Liverpuli që kur ka marrë drejtimin e ekipit para shtatë muajve, por ai do të ketë një vend të veçantë në zemrat e tifozëve anglezë, nëse ia del të mposhtë skuadrën e Seviljës në finalen e Ligës së Evropës. Kjo finale, që do të zhvillohet sonte në stadiumin e Bazelit dhe do të nisë në orën 20:45, do të sillet për sportdashësit drejtpërdrejt nga Rrjeti i Radio-Televizionit Shqiptar.

Klopi do t’i sillte Liverpulit trofeun e parë evropian, që prej përmbysjes së famshme kundër Milanit në finalen e Ligës së Kampioneve të vitit 2005, të zhvilluar në Stamboll. Sevilja, që është fituese në fuqi e Ligës së Evropës, padyshim se do të jetë kundërshtare ndryshe krahasuar me skuadrat tjera që ka eliminuar Liverpuli rrugës për në finale.

Klopi do të jetë kundër trajnerit Unai Emeri, ekipi i të cilit ka triumfuar në këtë garë në dy edicionet e fundit dhe po synon trofeun e tretë rresht. Në të vërtetë, Sevilja mban rekordin sa i përket trofeut të kësaj gare, pasi në dhjetëvjeçarin e fundit e ka fituar plot katër herë.