Në nenin 26 pika 3 të projektligjit të ri për Ligjin e Sportit, për sportistët e nivelit të lartë cilësohet: “Mënyra e shpërblimit të sportistëve që arrijnë kriteret e statusit të sportistit të nivelit të lartë dhe përfitimi i trajtimit për përgatitjen sportive përcaktohen me vendim të Këshillit të Ministrave”. Në fakt është specifikuar që shpërblehet dalja në 3 vendet e para në Kampionatin Evropian, dalja në 5 vendet e para në Kampionatin Botëror, dalja në 8 vendet e para në Lojërat Olimpike, dalja në vendin e parë në Lojërat e Mesdheut, si dhe rekordi evropian, botëror dhe olimpik.

“Unë po bëj një pyetje, – tregon Shytaj, – a mund ta dimë me çfarë neni apo ligji e nxorri qeveria 1.000.000 euro për kombëtaren kur u kualifikua për në Evropian, apo kur u fitua ndeshja me Rumaninë? Pikërisht me atë që është në nenin 26, pika 3, sepse konsiderohet rast i veçantë. Ne duhet të kemi parasysh kush është sportist cilësor dhe sportist i cilësisë. Sepse kështu i bie që të dalësh në vendin e 4-rt në Evropian dhe në vendin e 6-të në Botëror nuk përfiton asgjë. I duhet lënë dhe më shumë kompetencë qeverisë vendore.”

“Sepse nëse për Tiranën dalja në vendin e 5-të në një veprimtari kombëtare nuk është rezultat i mirë për një rreth të vogël është arritje, sqaron ai. – Dhe e merr me vendim të Këshillit Bashkiak. Për shpërblimet për sportistët e nivelit të lartë nuk mund të ketë ndarje me thikë, sepse ça do themi nesër ne për kombëtaren e futbollit nuk është sukses nëse nuk del në vendin e 6-të në Botëror, apo në vendin e 4-rt në Evropë. Dhe kjo ka vend për t’u parë.”