Pas gati tre vjet e gjysmë qeverisje, tashmë është gati projektligji për disa ndryshime dhe shtesa në Ligjin e Sportit nr.9376, datë 21 prill 2015. Parë kështu edhe kjo qeveri po e mbyll mandatin e saj pa bërë një ndryshim rrënjësor në Ligjin e Sportit, që do të thotë se vlerëson institucionet, por ajo që mbetet e brishtë është figura e sportistit. Sepse së pari nuk është marrë parasysh vërejtja e federatave sportive që duhet të ketë një pension të veçantë për të gjithë ata sportistë që mbyllin karrierën, të cilët i kanë dhënë vlera Shqipërisë në arenën ndërkombëtare kur marrin medalje Evropiane, Botërore dhe Ballkanike.
Pra, parashikimi për t’i njohur vitet e sportit si vite pune. Përkundrazi për këtë të fundit, ndërsa ka shpërblime për tre vendet e para në Evropë, pesë vendet e para në botë dhe për tetë vendet e para në Olimpiadë (që do të thotë se në momentin që hyn në fuqi ky ligj duhet të përfitojë shpërblim jo vetëm Calja për të pestin në Rio, por dhe Veli për të tetin në Rio), apo dhe vendin e parë në Mesdhe, duket si një fitore e zakonshme për të mos thënë e rëndomtë. Pa thënë që ashtu sikurse studimet me plan individual dhe pa konkurs duhet parashikuar dhe gjetja e një vendi pune që të mos lihet gjithçka në dorën e ministrit, apo dhe dëshirës së kryeministrit.
Të ishte taksative. Ndonëse qeveria qendrore dhe vendore siguron mbështetjen, trajtimin, shpërblimin dhe integrimin në sistemin arsimor, social e profesional të këtyre sportistëve. Në fund të fundit duke mbetur gjithnjë tek thënia “sportisti është ambasadori më i mirë një vendi”, atëherë i tillë duhet të ishte vlerësuar.
