ASNN – Shqipëria dhe Kosova janë një, edhe pse të ndarë në dy shtete aktualisht. Megjithatë, mungesa e një kohezioni politik, që lidhet me konjukturën ndërkombëtare politike e gjeopolitike, nuk lejon një bashkim të mirëfilltë politik dhe për rrjedhojë as bashkim të sportit kombëtar. Megjithatë, në projekt ekziston mundësia e krijimit të një lige mbarëkombëtare, me pjesëmarrjen e skuadrave më të mira, gjë që do të çonte në rritjen e cilësisë sportive në fushë, rritjen e nivelit të kampionatit dhe konkurrimin e tij më efikas në rang ndërkombëtar.

Në kushtet e zhvillimeve të fundit politike, pra pas arritjes së një marrëveshjeje Kosovë-Serbi nën moderimin e organizmave ndërkombëtare, mund të hapet rruga edhe për bashkimin e sportit e në veçanti të futbollit. Gazeta “Zëri” në Kosovë ka kontaktuar protagonistët në federatat shqiptare përkatëse në të dy anët e kufirit, ku ka marrë mendimin e kreut të FSHF-së, Armand Duka, dhe homologut të tij kosovar, Agim Ademi.

Të dy janë dakord për krijimin e një lige të përbashkët, por si Duka dhe Ademi topin e kanë hedhur tek politika. Sepse, sipas tyre, politika është përgjegjëse për jetën publike dhe bashkimin kombëtar në tërësi. Madje Duka ka bërë edhe një batutë të fortë, duke thënë se kjo mund të arrihet kur Ramush Haradinaj të bëhet kryeministër i përbashkët i shqiptarëve. “Kur të bëhet Ramush Haradinaj kryeministër i Kosovës dhe i Shqipërisë do të bashkohet edhe futbolli dhe do të krijojmë një ligë të përbashkët futbolli”, – tha ai. “Është ide e mirë, por gjithçka do të varet nga politika”, – përfundoi Duka. Kurse homologu i tij nga Kosova, Ademi, fare qartë u shpreh: “Është një çështje politike. Në momentin që ndodh bashkimi, krijimi i një lige të përbashkët ndodh për vetëm 5 minuta. Por, për sa kohë do të kemi shtete të ndara, atëherë do të mbetemi edhe me liga të ndara.”