ASNN – Luhen ndeshja e kthimit të turit të 16-shes, të premten hidhet shorti. Veprimtaria e dytë e klubeve të kontinentit, Liga e Evropës, është rikthyer të enjten me takimet e kthimit të turit të 16-shes. Rrjeti i Radio-Televizionit Shqiptar ka sjellë drejtpërdrejt në RTSH 1, takimin më të spikatur Milan- Mançester Junajtid, që është fituar nga anglezët 1-0. Ndërsa në RTSH Sport, duke nisur nga ora 19:00, e deri në ora 23:00, kanë ardhur drejtpërdrejt të gjithë golat e mbrëmjes. Ajaksi dhe Vijareali ia kanë dalë që fitores së arritur në ndeshjen e parë, përkatësisht 3-0 në shtëpi dhe 2-0 në fushë të huaj, duke fituar edhe në ndeshjet e kthimit e duke siguruar çerekfinalet.
Holandezët kanë fituar 2-0 në Zvicër ndaj Jang Bojs të Bernës, ndërsa me të njëjtat shifra kanë ngadhënjyer edhe spanjollët në shtëpi ndaj Dinamos së Kievit. Granada është mundur 1-2 në Norvegji përballë Moldes, por kualifikohet për në çerekfinale falë fitores 2-0 të korrur në ndeshjen e parë, ashtu sikundër është kualifikuar për më tej edhe Arsenali, pavarësisht se është mundur minimalisht në shtëpi përballë Olimpiakosit. Anglezët vijojnë për më tej falë fitores 3-1 të arritur në Greqi në ndeshjen e parë. Ndërkaq, edhe pse e kishte fituar ndeshjen e parë në fushën e vet, me shifrat 3-0, Roma ka vijuar të fitojë edhe Ukrainë 2-1 përballë Shahtjorit të Donjeckut dhe duke u kualifikuar bindshëm për në çerekfinale.
Aty ku do të mungojë Totenhemi, pasi skuadra e drejtuar nga trajneri Zhoze Murinjo nuk ia ka dalë të mbrojë atë fitore 2-0 të arritur në fushën e vet, duke u mundur 0-3 në Kroaci përballë Dinamos së Zagrebit. Fati i këtij takimi u vendos në dy kohët shtesë nga 15 minuta secila, pasi koha e rregullt u mbyll me fitoren 2-0 të kroatëve, të cilën gjetë edhe golin e 3-të në minutën e 106-të. Të papriturën tjetër të mbrëmjes e ka dhuruar Sllavia e Pragës, e cila ka kapërcyer atë barazim 1-1 në shtëpi, por duke u kualifikuar pasi ka fituar 2-0 në Skoci ndaj Gllasgou Rejnxhërs, aty ku golin e parë të çekëve e ka shënuar ish-futbollisti i Skënderbeut, Olajinka.
