ASNN – Fundjava që sapo lamë pas ishte mjaft pozitive për disa nga lojtarët shqiptarë që aktivizohen në kampionatet evropiane, të cilët jo vetëm kanë qenë titullarë e kanë pasur minutat e tyre, por edhe kanë realizuar gola. Vrioni e Selahi, dy legjionarët kuqezi kanë qenë protagonistë me skuadrat e tyre, duke shënuar në kampionatet përkatëse, Austri e Kroaci.
Vrioni, i cili luan në radhët e Tirolit në kampionatin austriak ka gjetur rrugën e rrjetës për herë të 10-të që nga fillimi i sezonit. Goli i tij në minutat e fundit të lojës nuk e shpëtoi skuadrën e Tirolit nga humbja, megjithatë vlen për t’u përmendur paraqitja e mirë e lojtarit shqiptar. Sakaq, edhe Lindon Selahi, i cili është pjesë e Rijekës në kampionatin kroat ka realizuar një gol fantastik në sfidën ndaj Shebenikut.
Mesfushori kuqezi, i cili ishte në lojë që nga minuta e parë, gjeti rrugën e rrjetës pasi e goditi fort topin nga jashtë zone, duke lënë të shtangur portierin kundërshtar dhe duke përshëndetur rrjetën. Ky ishte goli i dytë për futbollistin kuqezi në radhët e Rijekës.
Ndërkaq, minuta nën këmbë kanë pasur edhe futbollistë të tjerë. Marash Kumbulla ka luajtur për 90 minuta ndaj Hellas Veronës, Berat Gjimshiti ka qenë titullar gjithashtu, me shqiptarin që ka qenë edhe protagonist përgjatë javës së kaluar me dy golëshin e tij në Evropë.
Armando Broja i cili gjithashtu ka luajtur që nga minuta e parë në sfidën ndaj Evertonit, edhe pse nuk arriti dot ta gjente rrugën e rrjetës, Thomas Strakosha e Elseid Hysaj, të cilët gjithashtu kanë qenë titullarë me Lacion në ndeshjen ndaj Udinezes.
