ASNN – Pas Napolit, Milot Rashicën e kërkojnë edhe Lacio edhe Evertoni, ndërsa UEFA përzgjedh Milot Rashicën si djaloshin premtues të javës. Në fakt, sapo hyn në faqen zyrtare në Internet të organizmit që qeveris futbollin evropian, UEFA.com, menjëherë shfaqet një foto e madhe e Milot Rashicës.
“Djaloshi premtues të javës: Milot Rashica” është titulli që shoqëron shkrimin dedikuar futollistit shqiptar që ende nuk i ka mbushur 20-vjeç dhe që po bën një sezon me të vërtetë të shkëlqyer në kampionatin holandez me skuadrën e Viteshes së Arnhemit. Paraqitjet e sulmuesit kanë detyruar trajnerin e tij, Rob Mas të thuri elozhe për sulmuesin e tij të cilin e konsideron një nga lojtarët më të rëndësishëm të tij.
Po ashtu, ecuria në këtë sezon e bindi edhe trajnerin e Kombëtares shqiptare, Xhovani De Biazi, ta grumbullojë e skuadrën e parë, duke i dhuruar atij edhe debutimin në miqësoren e fundit kundër Luksemburgut. Për UEFA-n, Milot Rashica është e ardhmja e përfaqësueses kuqezi, por ende nuk është e sigurt nëse ai do të marrë ftesën nga De Biazi për në finalet e Euro 2016.
Por sido që të shkojë, sulmuesi do të jetë shumë i zënë gjatë verës së ardhshme. Që tani Milot Rashica është një nga emrat më të përfolur në merkato me Napolin që prej kohësh interesohet dhe ndjek nga afër futbollistin. Sidoqoftë, nëse kërkon të marrë shërbimet e tij, klubi napolitan duhet të shpejtojë, pasi në garë për lojtarin janë futur edhe skuadra të tjera të futbollit evropian.
Mediat italiane bëjnë të ditur se Lacio dhe Evertoni gjithashtu po bëjnë hapa përpara për të transferuar futbollistin në merkaton e verës. E sigurisht, në këtë interesim të madh, i fituar është klubi i Viteshes së Arnhemit, drejtuesit e të cilit fërkojnë duart, pasi aktualisht kartoni i Milot Rashicës vlerësohet deri në 5 milion euro.