ASNN – Trajneri Kristian Panuçi, gjatë konferencës së sotme për gazetarët, tha se në kushtet e dëmtimit të Rei Manajt, kishte kërkuar ardhjen me urgjencë të Fiorin Durmishajt, i cili është pjesë e klubit të Panioniosit në Superligën greke. Por informacionet e fundit thonë se Durmishaj nuk do të jetë pjesë e skuadrës kuqezi për dy duelet e radhës ndaj Skocisë dhe Uellsit, pas grekët e kanë bllokuar atë, duke mos e lënë të lirë.

Talenti shqiptar e ka të pamundur të lëvizë në këtë moment, pasi po kryen shërbimin e detyrueshëm ushtarak, në një moment që ai po pajiset me dokumentet greke. Ka qenë vetë Federata Shqiptare e Futbollit e cila ka kontaktuar me Panioniosin, por ka mësuar nga autoritetet greke se djaloshi shqiptar Fiorin Durmishaj nuk mund të lëvizë në këtë moment për shkak se është me shërbim ushtarak dhe është e pamundur që ai të dalë jashtë kufijve të Greqisë për momentin.

Kujtojmë këtu se Durmishaj nuk është i pari që nuk i ngjitet skuadrës në këtë periudhë. Pas refuzimit të Loret Sadikut, dëmtimit të Ylber Ramadanit dhe Manajt, ngërçit me Ivan Balliun, tani së fundmi del dhe problem i Durmishajt, duke bërë që Panuçi ta ketë të vështirë të gjejë ndonjë lojtar pasues për Rei Manajn në këtë moment.