ASNN – Lorik Cana mund të qendrojë edhe për një vit tjeter tek Lacio, ndonëse trembet nga minutazhi i paktë. Kështu, kapiteni kuqezi edhe mund të mos ndryshojë skuadër. Lorik Cana është ende në mëdyshje për të ardhmen, por mundësia për të mbetur edhe një sezon tek Lacio po fiton gjithnjë e më shumë terren.

Ai e di se nuk është zgjedhje e parë e trajnerit Pioli, por ende nuk ka gjetur një alternativë bindëse. Nga Katari nuk ka asgjë të re, po ashtu kampionati amerikan mund të provohet nja dy vjet më vonë, ndërsa nga Olimpiku i Marsejës nuk ka mbërritur tek Lacio ndonjë ofertë konkrete.

Nëse do të detyrohej të mbetej në Romë, kapiteni i kombëtares e di se do të duhej të kënaqej me shumë pak minuta. Kupa e Italisë, një rol si rezervë në Serinë A dhe në Ligën e Kampioneve, do të ishte gjithçka që do t’i ofrohej, ndonëse Loriku nga përvoja e gjatë në futboll e di se sezoni i ngarkuar mund të krijojë mundësi më të mëdha.

Dëmtimet dhe pezullimet do të jenë të pashmangshme. Në qershor, drejtori sportiv Igli Tare e tha qartë për mediat shqiptare se e ardhmja e Canës ishte larg “Olimpikos”, por mbrojtësi i qendrës ka edhe një vit kontratë dhe klubi italian nuk është kundër që ai të mbetet në skuadër.

Loriku dëshiron të stabilizohet sa më shpejt, edhe sepse dëshiron të jetë në formë për ndeshjet vendimtare të kombëtares në Eliminatoret e Kampionatit Evropian “Francë 2016”. Një gjë të tillë mësohet t’ia ketë kërkuar edhe trajneri Xhovani De Biazi, i cili kërkon të mbështetet plotësisht, dhe jo pjesërisht, tek kapiteni i tij.