ASNN – Pas debutimit me gol, Muja thotë se te Samsunspori ndihet si në shtëpi. Sulmuesi i krahut, Arbnor Muja, është shprehur i lumtur që është transferuar te Samsunspori. Futbollisti mitrovicas bëri lëvizje të befasishme, duke lënë kampionen e Belgjikës, Antverpin, për skuadrën që po kërkon qëndrimin në Superligën e Turqisë, Samsunsporin.
Futbollisti 25-vjeçar i Kombëtares kuqezi më 8 shkurt luajti për Antverpin në ndeshjen e vlefshme për Kupën e Belgjikës, ndërsa të hënën, më 12 shkurt, debutoi në Superligën turke. U aktivizua në minutën e 69-të në ndeshjen e javës së së 25-të të elitës turke, të cilën Samsunspori e fitoi 2-0 ndaj Antaljasporit. Muja shënoi golin e dytë, në minutën e 91-të, teksa realizoi me goditje brenda zonës, pasi u shërbye shumë bukur.
Fitorja ishte shumë e rëndësishme për Samsunsporin, që u ngjit në vendin e 13-të me 29 pikë. “E kemi ditur që kjo ndeshje do të jetë shumë e vështirë, – ka thënë Muja për mediat turke. – Jam shumë i lumtur që kemi fituar. E kam ditur që një atmosferë e tillë na pret në stadium. Kemi tifozë të jashtëzakonshëm. Jam po ashtu shumë i lumtur që jam lojtar i Samsunsporit.”
Me Antverpin, futbollisti me tipare sulmuese mori pjesë në fazën e grupeve të Ligës së Kampionëve, ndërsa tani do të luajë në elitën turke. “Kam shënuar golin e parë në ndeshjen e parë dhe kjo më bëri shumë të lumtur, – ka vijuar Muja. – Kam pak kohë që jam këtu, por po ndihem si në shtëpi. Bashkëlojtarët, stafi i klubit dhe trajnerët janë faktor i madh që më bëjnë të ndihem kështu. Do të punojmë shumë që të vazhdojmë me rezultate pozitive.”
Në Superligën turke janë 20 skuadra, teksa 4 prej tyre zbresin nga elita në fund të edicionit. Samsunspori ka dy pikë më shumë se skuadra e vendit të së 17-të, që në fund dërgon në kategorinë e dytë. Gara për ekzistencë është shumë e fortë dhe shumë e hapur. Muja ishte transferuar te skuadra belge e Antverpit, në verën e vitit 2022, ndërsa në Belgjikë fitoi gjithë trofetë.
Por, papritur, javën e kaluar vendosi të transferohet te Samsunspori, që për trajner ka gjermanin Markus Gisdol. Pritej që ai të transferohej së shpejti në ndonjë ligë tjetër të madhe evropiane, por tani është në Turqi. Edicionin e kaluar, Samsunspori fitoi titullin në ligën e parë turke dhe kështu u promovua në Superligë, ku synon të qëndrojë edhe për edicionin e ardhshëm. Në skuadrën turke presin shumë nga Muja.
