ASNN – Sigurisht që erdhi si një rrufe në qiell të hapur por ishte prapëseprapë një transferim i bujshëm ai i Ernest Muçit te Beshiktashi në orët e fundit të merkatos në Turqi. Vetëm pak orë më parë, ish-fantazisti i Tiranës u zyrtarizua si lojtari më i ri “Shqiponjave të zeza” të Besiktas, me gjiganden e futbollit turk që derdhi plot 10 milionë Euro në arkat e polakëve të Legias së Varshavës për kartonin e 22-vjeçarit, operiacion nga i cili do të përiftojnë edhe rekordmenët e Kategorisë Superiore.
Sulmuesi i Kombëtares shqiptare zbarkoi në Stamboll dhe tha fjalët e tij të para si futbollist i “shqiponjave”. Ai u shpreh se është shumë i lumtur që është pjesë e një klubi legjendar në Turqi si Beshiktashi dhe se gjithashtu tregoi për transferimin e tij, që ndodhi shumë shpejt. “Jam shumë i lumtur që ndodhem këtu, – ka thënë ai. – Është një ëndërr e kthyer në realitet për mua që të luaj për një klub kaq të madh. Mezi po pres të përshëndetem me të gjithë tifozët, të takoj lojtarët, trajnerin.”
“Mezi po pres të filloj, – ka vijuar ai. – Jam shumë i lumtur që jam pjesë e këtij klubi legjendar në Turqi. Transferimi? Ndodhi shpejt sipas mendimit tim. Ndodhesha në hotel, sepse do të luaja ndeshjen e radhës me ish-klubin tim sot. Kështu që ndodhi shumë shpejt. Në mëngjes udhëtova drejt Varshavës që të isha këtu. Ndodhi shumë shpejt dhe jam shumë i lumtur që u krye ky transferim. Është një nder i madh për mua që të jem pjesë e një klubi kaq të madh,” – ka thënë Ernest Muçi pas mbërritjes së tij në Stamboll.
