ASNN – Edhe atyre që kishin shpresuar për një surprizë të çasteve të fundit, ka menduar për t’ua shuar shpresat menaxheri i mbrojtësit Elseid Hysaj. Ai ua ka mbyllur derën ekipeve angleze për këtë merkato të janarit, duke e shtyrë gjithçka për në verë.

Mario Xhufredi ka folur për klientin e tij duke thënë se momentalisht Hysaj do të qëndrojë te Napoli. “Çellsi dhe Arsenali? Jemi të lumtur që i dëgjojmë emrat e këtyre skuadrave të mëdha dhe që shprehin interesim”, – ka thënë ai.

“Mbetet të shihet se çfarë do të ndodh në verë, – ka vijuar italiani. – Për momentin, Hysaj është plotësisht i përqendruar tek Napoli dhe dëshiron ta mbyllë sezonin sa më mirë të jetë e mundur.”

“Për mua, merkatoja e janarit nuk ekziston, pasi të gjithë transferimet e mëdha kryhen gjatë verës”, – ka përfunduar Mario Xhufredi, menaxheri i mbrojtësit kuqezi, Elseid Hysaj.