ASNN – Mbrojtësi i Kombëtares kuqezi, Mërgim Mavraj, pëson një tronditje të madhe në prag të startit të pjesës së dytë të sezonit në Bundesligën 2 të Gjermanisë. Kalimi me shumë bujë në radhët e skuadrës gjermane dhe natyrisht dimensioni mjaft pozitiv që mori nga vetë krerët e klubit dhe trajneri i skuadrës, duket se “morën më sysh” mbrojtësin kuqezi, i cili pësoi të martën një dëmtim të rëndë.

Mavraj u dëmtua në stërvitje dhe mjekët e nisën drejt spitalit për ekzaminime të mëtejshme sepse konstatuan një frakturë në dorë. Pas ekzaminimeve u vendos për ndërhyrje kirurgjikale, e cila u bë menjëherë dhe që kaloi me sukses. Por nuk dihet sa kohë do të mungojë mbrojtësi, madje vetë klubi gjerman vetëm ka dhënë lajmin për dëmtimin dhe kalimin me sukses të operacionit, por nuk ka saktësuar asnjë periudhë për kthimin e lojtarit në fushë.

Mavraj mbërritur në radhët e Ingolshtadtit në ditët e fundit të dhjetorit, pasi braktisi Arisin e Selanikut me një marrëveshje mirëkuptimi me klubin grek. Më herët ai ka pasur një eksperiencë të gjatë në shumë skuadra gjermane të ligës së parë e të dytë dhe ka krijuar profilin e një futbollisti të nivelit të lartë. Dëmtimi i fundit erdhi në momentin e gabuar për lojtarin, i cili kishte pritshmëri për t’u bërë kapiten i Ingolshtadtit.