ASNN – Manaj-Salernitana, sa pranë, sa larg… Futbollisti kuqezi ishte pranë kalimit tek klubit të Serisë A në janar. Sulmuesi shqiptar, Rei Manaj, mund të ishte përforcimi në sulmin e Salernitanës në merkaton e janarit. Ka qenë vetë agjenti i futbollistit që ka zbuluar të vërtetën dhe duke folur për mediat italiane, ai ka theksuar se pritej vetëm miratimi i klubit turk të Sivasporit, që në momentin e fundit ka bërë një kërkesë të paarsyeshme, që më pas ka rrëzuar gjithçka.

Ishte shumë pranë, teksa shumica e punës ishte bërë dhe pritej vetëm miratimi i klubit turk, që në momentin e fundit ka bërë një kërkesë të paarsyeshme, që më pas ka rrëzuar gjithçka. Kështu, sulmuesi shqiptar, Rei Manaj, mund të ishte përforcimi në sulmin e Salernitanës në merkaton e janarit, gjë që, në anën tjetër, do ta kishte lënë Vajzmanin të lirë për kaluar tek Specia.

Ka qenë vetë agjenti i futbollistit Vinçenzo Pisakane, që ka zbuluar të vërtetën dhe duke folur për faqen e specializuar sportive italiane “TuttoMerkatoWeb”. “Ishte praktikisht një marrëveshje e mbyllur me Salernitanën”, – ka rrëfyer ai, duke folur shkurtimisht për median në fjalë. “Pastaj Sivaspor e pesëfishoi kërkesën fillestare dhe nuk mund të bëhej më asgjë”, – ka shtuar agjenti i futbollistit kuqezi.

Rei Manaj po kalon në Turqi sezonin më të mirë të karrierës së tij, teksa ka shënuar deri më tani 15 gola në 23 paraqitje për Sivasporin. Kjo paraqitje ka bërë që ai të rikthehet në radarët e Kombëtares kuqezi dhe e ka detyruar edhe trajnerin Silvinjo të udhëtojë drejt Turqisë për ta parë dhe për të biseduar nga afër me futbollistin, teksa i mban të hapura të gjitha mundësitë e tij për zgjedhje sa i përket skuadrës me të cilën do të paraqitet në “Euro 2024”.