ASNN – Mbrojtësi i Kombëtares së Shqipërisë, Marash Kumbulla është huazuar nga Roma te skuadra tjetër që militon në nivelit më të lartë të kampionatit të futbollit në Itali, Serinë A, tek Sasuolo. Me Romën, 23-vjeçari ka kontratë deri në qershor të vitit 2025, ndërsa te skuadra e Sasuolos do të ketë më shumë hapësirë për t’u paraqitur në qendër të mbrojtjes.
Më herët, ai e ka nisur karrierën tek skuadra e Hellas Veronës. Për shkak të një dëmtimi, Kumbulla nuk ka luajtur asnjë ndeshje në edicionin aktual të futbollit me Romën në Itali. Kurse me fanellën e Shqipërisë, qendërmbrojtësi ka luajtur 18 ndeshje. Dhe, ndonëse ai është gati për aventurën e re me Sasuolon, Marash Kumbulla nuk e harron Romën.
Në ditën e fundit të merkatos dimërore, Marash Kumbulla u largua nga Roma për t’u transferuar falë formulës së huazimit te Sassuolo. Pas 3 vitesh në kryeqytet, mbrojtësi i kombëtares shqiptare nis përvojën e 3-të në një klub të Serisë A teksa 23-vjeçari është shumë pranë rikthimit nga dëmtimi në gju që e mbajti jashtë fushave të lojës për një periudhë të gjatë. Pjesë e Sasuolos është edhe mesfushori kuqezi, Nedim Bajrami.
Në të njëjtën kohë, Kumbulla nuk harron të falënderojë Romën për të gjitha ndjesitë që i dhuroi duke qenë se me romanët fitoi trofeun e Ligës së Konferencës në finalen e Tiranës përballë Fejënordit. “Faleminderit për mënyrën se si më pritet dhe për emocionet që më dhuruat, – shkruan ai në rrjetet sociale. – E sigurt është se nuk do t’i harroj kurrë.”
“I uroj klubit dhe tifozëve të mrekullueshëm të skuadrës që ta mbyllin sezonin në mënyrën më të mirë, i uroj fat dhe shpresoj që gjithçka të shkojë mirë”, – shtoi Kumbulla. Ndërkohë, për mbrojtësin tashmë nisin muaj të rëndësishëm pasi i duhet të gjejë formën optimale, si dhe të shndërrohet në një titullar të Sasuolos për të luajtur më pas shanset për një grumbullim të mundshëm me Shqipërinë nga trajneri Silvinjo në “Euro 2024”.
