ASNN – Mbrojtësi i Kombëtares tonë, Elseid Hysaj, po kalon një periudhë të pasigurt te Napoli, pasi trajneri Karlo Ançeloti po e vendos atë herë në krahun e majtë të mbrojtjes e herë në të djathtë, ndërsa në ndeshjen e fundit në Ligën e Kampioneve kundër PSG-së Hysaj ishte në stol.
Megjithatë, shkodrani ia ka dalë të jetë në listën e 10 lojtarëve më të vlerësuar në Serie A sa u përket pasimeve të sakta. Mbrojtësi kuqezi është aktivizuar këtë sezon në 8 ndeshje dhe ka 720 minuta lojë. Në këtë hapësirë ai ka dhuruar edhe një passim për gol.
Edhe pse ka skeptikë dhe kritikë që i nxjerrin në pah vetëm të metat, Hysaj ëstë një nga 10 lojtarët më të mirë në Serie A sa i treguesit të mësipërm. Hysaj ka realizuar 517 pasime të sakta, kurse dy vendet e para i mbajnë Brozovic dhe Kulibali me 689 dhe 651 pasime të sakta.
Duket qartë se Hysaj është efikas në lojë dhe këtu vërtetohen fjalët e menaxherit Xhufredi, i cili në formë ironike deklaronte në mediat italiane pak ditë më parë “ku i kanë sytë kritikët kur Hysaj shkëlqen në fushë”.
