ASNN – Granit Xhaka zbulon sekretin e madh: Bazeli donte vetëm Taulantin, por babai u tha: “O të dy, o asnjërin!”. Mesfushori shqiptar i përfaqësueses zvicerane, i cili është njëherësh pjesë e Arsenalit në Premier Ligën Angleze, Granit Xhaka, ka zbuluar një episod mjaft interesant nga hapat e parë në futboll, atëherë kur ishte fare i vogël. Ai ka deklaruar për mediat se është bërë futbollist profesionist falë talentit të vëllait të tij të madh, Taulant Xhakës, si dhe këmbënguljes së babait të tij, Ragip Xhaka.
Edhe pse i talentuar ishte Taulanti, puna e madhe dhe forca bënë që Graniti të çante më shumë në karrierë, duke luajtur me klube të mëdhenj si Bazeli, Borusia e Mënshengladbahut e, së fundmi, Arsenali, kurse Taulanti ka mbetur akoma pjesë e Bazelit, kjo dhe për dëshirën e tij. Graniti tregon një histori mjaft interesante se si ata të dy si vëllezër e nisën karrierën së bashku tek Bazeli në Zvicër, me këmbënguljen e babait të tyre, që u tha zyrtarëve të klubit prerazi: “O të dy, o asnjërin”.
“Taulanti është më i talentuar se unë, – thotë Granit Xhaka, – karakteristika ime kryesore është se jam punëtor i madh. Nëse duhet bërë diçka nuk e lë për nesër, por e bëj sot dhe nesër. Unë jam pranuar tek Bazeli falë vëllait dhe babit tim. Ata donin që të merrnin vetëm atë, por babai u tha: “O të dy, o asnjërin”. Ata u detyruan të më merrnin dhe mua.” Të dy vëllezërit hynë një historinë e futbollit evropian dhe botëror, në një kapitull të veçantë të tij.
Ata janë përballur me njëri-tjetrin në kuadër të fazës finale të Kampionatit Evropian të Francës në 2016-ën, ku Taulanti përfaqësoi ngjyrat kuqezi të Shqipërisë, kurse Granit me disa shqiptarë të tjerë si Behrami, Xhemaili, Memedi e Shaqiri, përfaqësuesen e Zvicrës. Shtypi evropian i kishte në faqe të parë në ditët e Evropianit, për shkak të rivalitetit të madh, madje duke fokusuar edhe familjarët që kishin veshur bluza me ngjyrat e të dy vendeve.
