ASNN – Këmbana angleze duket se po bien për mbrojtësin e Kombëtares, Elseid Hysaj, i cili është në listën e dëshirave të trajnerit të ri të Çellsit, Antonio Konte.  Ai është interesuar për 22-vjeçarin kuqezi, i cili i ka befasuar të gjithë në Serinë A. Hysaj ka qenë titullar në të gjitha ndeshjet e Napolit, duke u bërë i pazëvendësueshëm në formacionin që lufton për titull në Itali.

Elseid Hysaj do të jetë i vëzhguar special në finalet e Euro 2016, pasi emri i tij është shfaqur në listën e merkatos së klubeve më të mëdhenj të Evropës. Mediat britanike shkruajnë se blutë e Londrës kanë ringjallur interesimin për mbrojtësin shqiptar të Napolit. Klubi londinez u interesua edhe verën e kaluar, por më pas bleu Rahman Baban, ndërsa Hysaj kaloi nga Empoli te Napoli, duke ndjekur trajnerin Sarri.

Tanimë në stolin e Çellsit do të ulet Antonio Konte dhe ai është i interesuar për 22-vjeçarin kuqezi, i cili i ka befasuar të gjithë në Serinë A. Hysaj ka qenë titullar në të gjitha ndeshjet e Napolit, duke u bërë i pazëvendësueshëm në formacionin që lufton për titull në Itali. Edhe pse luan kryesisht mbrojtës i djathtë, Hysaj ka treguar se luan po aq mirë edhe në krahun tjetër të mbrojtjes.

Ai ka një kontratë deri në vitin 2020 me Napolin, por largimi mund të jetë vërtet afër, pasi interesim për të kanë shfaqur edhe klube të tjerë, si Bajerni i Mynihut, Bajer Leverkuseni apo Atletiko e Madridit. Interesimi për të ka qenë deri në nivelin e vëzhgimit të kujdesshëm nga afër, pa oferta konkrete, megjithatë është e sigurt që vera do të sjellë të tilla, pas një sezoni fantastik në Serinë A, mbyllur me shfaqjen kryesore të futbollit evropian në verë, në Euro 2016.