ASNN – Për futbollistin e përfaqësueses së Shqipërisë, Elseid Hysaj, ka interesime edhe nga klube të tjera në Evropë dhe së fundmi mësohet se për të ka shprehur interesim të drejtpërdrejtë trajneri i Atletikos së Madridit, Diego Simeone. Sipas mediave italiane, skuadra madrilene është shprehur e gatshme të paguajë deri në 40 milionë Euro për mbrojtësin shqiptar.
Duket se nuk është vetëm Mauricio Sarri që e dëshiron mbrojtësin shqiptar Elseid Hysaj në skuadrën e Çellsit të Londrës. Përkundrazi, për futbollistin e përfaqësueses së Shqipërisë ka interesime edhe nga klube të tjera në Evropë dhe së fundmi mësohet se për Hysajn ka shprehur interesim të drejtpërdrejtë trajneri i Atletikos së Madridit, Diego Simeone.
Sipas mediave italiane, skuadra madrilene është shprehur e gatshme të paguajë deri në 40 milionë Euro për mbrojtësin shqiptar dhe pritet që palët të nisin negociata të shpejta, për një transferim të Hysajt që në janar drejt kryeqytetit spanjoll. “Mësohet se, për Hysajn ka hyrë në garë me forcë Atletiko Madrid i Diego Simeones, – shkruajnë mediat italiane, – kanë filluar kontaktet e para me menaxherin e lojtarit, Mario Xhiufredi.”
“Ky i fundit ka qenë plotësisht i gatshëm për të diskutuar transferimin e tij në Madrid, me Napolin që është gati gjithashtu të dëgjojë ofertat”, shtojnë mediat italiane, të cilat, më tej, japin edhe argumentet pse Hysaj ka më shumë gjasa të përfundojë në Madrid tek Atletiko sesa tek Çellsi në Premier Ligë, duke shkruar: “Atletiko Madrid e cilëson Hysajn një element të aftë për fazën mbrojtëse”.
“Dhe skuadra e Simeones dihet nga të gjithë që e ka shumë përparësi barazpeshën në prapavijë. Transferimi i mundshëm konkretizohet ndoshta që në merkaton e janarit. Flitet për një shifër transferimi prej 40 milionë eurosh”, – përfundojnë mediat italiane. Më herët, menaxheri Xhiufredi, kishte deklaruar për mediat italiane se për Hysajn në këtë moment po interesohen disa klube të fuqishme evropiane.
Klube që ofrojnë deri në 40-45 milionë Euro. Por ai shtoi në fund se një rinovim kontrate me Napolin nuk është e pamundur, përkundrazi, sipas tij mund të ketë surpriza të mëdha në ditët në vijim.
