ASNN – Në Superligën helene, u përballën të shtunën Larisa me Panioniosin, në një duel ku luajti edhe një prej talenteve shqiptare që aktivizohet në kampionatin grek, Fiorin Durmishaj. Këtë ndeshje e fitoi Larisa me rezultatin 4-2, pra humbi ekipi i Durmishajt,

Por futbollisti që u ftua nga trajneri Kristian Panuçi në Kombëtare për ndeshjet e nëntorit (nuk erdhi pasi nuk e lejoi ushtria greke të kalojë kufirin si pasojë e shërbimit të detyrueshëm ushtarak), la gjurmë në këtë takim.

Kjo pasi në minutën e fundit të ndeshjes, kur rezultati ishte 4-1 për Larisën, lëshon një “predhë” nga jashtë zone, nga një largësi prej 20 metrash, duke shënuar një supergol, një realizim i përkryer që entuziazmoi jo pak edhe spikerin grek që transmetonte ndeshjen.

Durmishaj cilësohet edhe në shtypin sportiv grek si një prej futbollistëve me të ardhme, madje që ka marrë oferta të shumta dhe nga kampionate cilësore jashtë Greqisë. Për 22-vjeçarin është interesuar edhe Federate Helene e Futbollit që ta aktivizojë me përfaqësuesen e saj, por djaloshi shqiptar ka bërë zgjedhje zemre, duke kaluar fillimisht nga Shpresat e Alban Bushit e tashmë dhe në përfaqësuesen e madhe kuqezi.