ASNN – Duel brenda familjes Ajeti, vëllai i vogël Albiani i nxjerr shpatullën vendit vëllait të madh Arlindit. Gras’hopersi u përball me Bazelin dhe humbi 1-3, por më shumë se ndeshja në kampionatin zviceran, bëri bujë fakti se u përballën me njëri-tjetrin vëllezërit shqiptar Ajeti. Nga njëra anë mbrojtësi i Kombëtares së Shqipërisë dhe mbrojtësi i Grasshopersit, Arlind Ajeti, e nga ana tjetër vëllai i tij Albian Ajeti, që është sulmues i Bazelit dhe përfaqësueses së Zvicrës.

Dy vëllezër kundër njëri-tjetrin, njëri mbrojtës me qëllim për të ndalur sulmuesin që ishte vëllai i tij. Dhe kjo përballje ka rezultuar me pasoja, pasi mbrojtësi i Shqipërisë ka përfunduar me shpatull të nxjerrë nga vendi, duke bërë që të pësojë një dëmtim që e lë jashtë fushave për disa muaj. Siç shprehen mediat zvicerane, pasojat e asaj përplasje me vëllanë kanë qenë të rënda, pasi dëmtimi kërkon një ndërhyrje kirurgjikale që do të kryhet sot, ndërkohë që lojtari mund të kthehet në fushë vetëm gjatë vitit 20189.

Për këtë vit ai e mbyll historinë, sepse dëmtimi është serioz. “Kjo është një situatë e sikletshme, më vjen shumë keq për vëllanë tim. Nuk është aspak e bukur të nxjerrësh shpatullën. Unë uroj që të kthehet sa më shpejt”, ishin fjalët e Albian Ajetit pas ndeshjes, kur u shfaq para medieve përkrah vëllait të tij. “Nëse futbolli do të dëshirojë, ne do të takohemi përsëri 20 herë, 2 herë apo asnjëherë. Por kur të ndodhë, më mirë të evitojmë pak më shumë njëri-tjetrin”, – shtoi ai.

Nga ana tjetër, vetë Ajeti i Kombëtares së Shqipërisë, e ka përjetuar keq këtë sfidë, jo për shkak të dëmtimit. “Deri tani kemi qenë gjithmonë bashkë. Tani të luash kundër vëllait tënd nuk është aspak e këndshme”, – theksoi mbrojtësi kuqezi.